Gréissere Pompjeesasaz zu Monnerech wéinst Feier
Wéi et vun der Police heescht, wier et géint 15.30 Auer zu engem Feier an der Escher Strooss zu Monnerech komm.
Vun Zeien op der Plaz huet et geheescht, datt ee kuerz virum Ausbroch vum Brand e Knuppe wéi Freedefeier héieren hätt. D'Police huet op Nofro confirméiert, datt et zu engem Feier koum.
Et soll an engem Haus zu enger "Aart Explosioun" komm sinn, heescht et vum CGDIS. Wéi déi éischt Ween op d'Plaz koumen, stoung eng Garage a Flamen. Ënnert anerem huet hei Pyrotechnik gebrannt. D'Feier hätt och schonn op d'Haus niewendrun iwwergegraff. Direkt gouf probéiert, d'Ausbreede vum Feier op weider Haiser ze evitéieren, wat den Asazekippen och gelongen ass. Den Yves Legil vum CGDIS confirméiert da weider, datt dräi Persoune fir eng Kontroll an d'Spidol koumen. Si goufe liicht blesséiert.
De CGDIS ass mat 80 Leit op der Plaz, fir dass si sech wéinst der Hëtzt reegelméisseg ofléise kënnen. Am Asaz sinn d'Rettungsdéngschter vu Monnerech, Suessem, Déifferdeng, Keel, Lëtzebuerg, Esch, Diddeleng, Schëffleng, Péiteng an Hesper.
