Am Mëttelpunkt stounge "Sécherheet, d'Policepresenz an d'Iwwerwaachung vun der ëffentlecher Uerdnung."
Am Ganze goufen 20 Persoune kontrolléiert.
Eng Persoun hat d'ëffentlech Uerdnung gestéiert a krut e Platzverweis. Well si der Uweisung net nogaangen ass, gouf si vun der Plaz ewechgeholl. Kuerz drop gouf dee selwechte Mann nees op där selwechter Plaz ugetraff a krut en zweete Platzverweis.
12 Polizisten aus der Regioun "Capitale" waren un der Kontroll bedeelegt.
Um Mëttwoch géint 6.30 Auer goufe bei engem Liwwerwon an der Rue Joseph Junck an der Stad e Rucksak an e Portmonni geklaut. D'Affer war grad amgaangen, Saachen aus dem Gefier ze lueden, wéi zwee Verdächteger d'Chauffersdier opgemaach an de Rucksak matgeholl hunn. Bei der direkt ageleeter Sichaktioun konnt ee vun de Verdächtege gefaasst ginn. De geklaute Rucksak gouf kuerz drop an der Rue de Reims erëmfonnt. D'Enquête huet erginn, datt de Verdächtege probéiert hat, mat de geklaute Kreditkaarten ze bezuelen.
An der Nuecht op den 27. August huet eng Policepatrull géint 2 Auer zwee Männer an der Rue de Bonnevoie kontrolléiert. Am Kader vun den Ermëttlungen huet sech erausgestallt, datt kuerz virdrun an d'Kellerraim vun engem Wunnhaus an der Rue du Verger agebrach gi war. Bei enger Kierperkontroll goufe bei de Verdächtegen ënner anerem eng Zaang, Lieder- a Latexhändschen an e Kellerschlëssel fonnt, dee si beim Abroch matgeholl haten.
