Opgepasst am ëffentlechen TransportPolice warnt virun Täschendéif an der Stad

Mam Ufank vum Chrëschtmaart an der Stad wier d’Zuel vun den Iwwerfäll net just op de Mäert, ma och am ëffentlechen Transport staark an d’Luucht gaangen, mellt d’Police. Op dëse Plaze sollten d’Leit besonnesch op hir Saachen oppassen. D’Beamte wieren dowéinst och méi um Terrain, fir Presenz ze weisen - dat virop an deenen Zäiten, wou vill lass ass. D’Police weist drop hin, datt d’Leit d’Beamten op der Plaz och direkt kënnen uschwätzen, wa si ee Problem hunn.

D’Täschendéif géife ganz gäre Mënschemassen notzen, oder aner Momenter, an deenen hir Affer ofgelenkt sinn, fir hinnen d’Wäertsaachen ze klauen. Dacks bemierken d’Affer d’Dot och eréischt ee gudde Krack méi spéit. D’Police encouragéiert d’Leit, trotzdeem eng Plainte ze maachen, wa si mierken, datt hinnen eppes geklaut gouf. Suspekt Persoune kënnen der Police iwwerdeems iwwer den 113 gemellt ginn.

Esou kënnt Dir den Täschendéif d’Aarbecht schwéier maachen

• Passt op, wann den ëffentlechen Transport iwwerfëllt ass. Loosst Iech net oflenken an haalt wa méiglech Ofstand zu anere Persounen
• Passt besonnesch beim eran- an erausklammen op, well d’Déif do den direkte Kontakt sichen
• Passt op, datt aner Persounen net an Är Posch kucke kënnen
• Paakt Äre Portmonni oder Handy am beschten an déi bannescht Täsch vun Ärer Jackett
• Loosst Är Posch ni aus den Aen
• Klemmt Är Posch mat der Ëffnung no bannen tëscht Aarm a Kierper an
• Passt op, datt Är Posch ëmmer zou ass