Ausbléck op 2026 zu LëtzebuergWat ännert alles am neie Joer?

Geld

• De Statec rechent dermat, dat déi nächst Indextranche am drëtten Trimester vum neie Joer erfält. Domat gëtt d’Präisdeierecht ausgeglach. Paien a Pensioune ginn dann ëm 2,5 Prozent erop.
  
• D’Rentner kenne sech elo scho freeën. D’Pensioune gi revaloriséiert a klammen op den 1 Januar ëm 1,5 Prozent. Dat si 45 Euro, fir eng Rent vun 3.000 Euro. D’Regierung plangt eng degressiv Aide fir Senioren.
  
• Manner deier misst d’Elektresch ginn, well de Präis vum Stroum u sech erof geet, an de Staat d’Netzkäschten iwwerhëlt.
  
• Méi deier wäerten awer Bensinn an Diesel ginn. D’CO₂ Tax geet nees erop, wat un der Pompel e plus vun ongeféier 1,5 Cent de Liter ausmaache misst.
  
• Méi bezuele wäert een an Zukunft och fir kleng Päck aus Drëttstaate kommen. Vum 1. Juli 2026 u kënnt an der ganzer EU eng Tax vun 3 Euro de Colis.
  
• Bezuele wäerte mer an Zukunft mat Mënzen, op deenen de Kapp vum neie Grand-Duc Guillaume ass.
  
• Mëtt Januar kommen déi éischt ‘Defence Bonds’ eraus. Staatsobligatiounen, déi iwwer d’Lëtzebuerger Verdeedegungs-Projete finanzéiert ginn.

Mobilitéit

• Op der A3, der Diddelenger Autobunn, wäerten d’Radaren, déi de Covoiturage op der drëtter Spuer kontrolléieren, schaarf gestallt ginn.
  
• Direkt niewendru gëtt d’ganzt Joer iwwer weider um Bau vun der Zuchstreck geschafft. Wat nees, besonnesch an de Vakanzen, en Impakt op den Trafic wäert hunn.
  
• Um Kierchbierg wäert iwwerdeems den Ausbau vum Tram weider lafen.
  
• Vum 1. Januar un gëtt d’Autosversécherung digital. Nieft der traditioneller grénger Kaart, kann een eng digital Versioun op den Handy lueden.

Nei Gesetzer

• Kuerz virun der Chrëschtvakanz gestëmmt, wäert dat neit Gesätz iwwer Ouvertureszäiten am Handel a Kraaft trieden. An der Woch kënne Geschäfter da vu Moies 5 bis Owes 9 op hunn, de Weekend bis Owes 7. Sonndes kënnen d’Geschäfter 8 Stonnen opmaachen.
  
• A Kraaft trëtt och d’Rentereform. Mat als Konsequenz, datt d’Cotisatiounen ëm 1,5 Prozent erop ginn. Opgedeelt op Employé, Patron a Staat. Fir datt eng Carrière komplett ass, ziele vum 1. Juli 2026 un net méi just 40 Joer. D’Zäit klëmmt progressiv. Zum Beispill ee Mount, fir Leit déi bis Enn 2026 a Pensioun ginn. 2030 wäerten et aacht Méint méi sinn.
  
• Ugangs vum Joer wäert d’Regierung och déi geplangt Steierreform am Detail virstellen.
  
• Fir Schoulrentrée 2026-27 wäert et ee grousst Changement ginn. D’Schoul gëtt obligatoresch bis 18 Joer. Bis elo waren et 16. An d’Eltere kréien de Choix, ob hiert Kand op Däitsch oder Franséisch Liesen a Schreiwe léiert.
  
• Um Enn och nach eng gutt Nouvelle fir ons Ëmwelt. Weider Géigestänn aus Plastik, déi just eemol benotzt ginn, gi verbueden. Fir manner Plastik-Dreck ze produzéieren.