E fréiere Mataarbechter vum US-Geheimdéngscht CIA ass verurteelt ginn, wëll hie geheim Dokumenter u Wikileaks weiderginn huet.
Eng Jury am US-Bundesstaat New York huet den 33 Joer ale Mann an allen 9 Uklopunkte fir schëlleg gesprach. Hie muss mat bis zu 80 Joer Prisong rechnen.
Wikileaks hat 2017 dausende Säite vu confidentiellen Dokumenter iwwer Softwareprogrammer verëffentlecht, mat deenen d’CIA Smartphonen a Computere vu Verdächtege baussent den USA ausspionéiert huet. Den Ugekloten hatt bis 2016 als Softwareingenieur beim Geheimdéngscht geschafft.
