Villméi wier de Mataarbechter vum Dom en Dënschdeg géint 10:45 Auer esou een onangeneeme Geroch an d'Nues geklommen, datt si sech gezwonge gesinn hunn, den Noutruff ze wielen. D'Pompjeeë wieren dann och direkt op d'Plaz gefuer an hunn d'Situatioun änlech ageschat, mellt ënnert anerem d'Stad Tréier an enger Pressematdeelung.
Dowéinst gouf net just den Dom, ma och d'Liebfrauenkirche direkt niewendrun evakuéiert. Et hätt op enger Rei Plazen uechter d'Gotteshaiser staark no "Kaz" gericht, schreift den "Trierischer Volksfreund". Well d'Source vum schlechte Geroch awer net ze fanne war, koume weider Experten an den Asaz, dorënner eng Spezialunitéit fir den Zivilschutz, déi op d'Sich no "cheemeschen, biologeschen, radiologeschen an nukleare Waffe" spezialiséiert ass.
D'Resultater aus Miessapparater op der Plaz hätten Entwarnung ginn, ma trotzdeem wier géint kierz viru Mëtteg nach ee spezielle Ventilator an den Asaz komm, fir de Geroch aus dem Dom nees erauszekréien. Eng Loftprouf gouf iwwerdeems fir weider Analysen an ee Labo zu Ludwigshafen geschéckt. Géint 12:45 Auer war den Asaz, un deem eng 30 Pompjeeën an d'Police vun Tréier bedeelegt waren, nees eriwwer, mellt den "Trierischer Volksfreund".
Den Domdechant Georg Holkenbrink sot der Tréierer Zeitung géigeniwwer, hie géif dovunner ausgoen, datt déi sténkeg Substanz express am Dom verdeelt gi wier.
