Um Fluchhafe vun der australescher Groussstad Sydney ass et e Sonndeg bal zu enger Kollisioun tëscht zwou Passagéiermaschinne komm. En Airbus A320 vun der Bëllegfluchgesellschaft Jetstar huet kuerz virum Start misse staark ofbremsen, well eng Boeing 777 vu Qatar Airways op eemol um Fluchfeld gehënnert huet.
Den australesche Loftverkéierssécherheetsautoritéiten no hunn déi zwou Maschinnen nëmme wéineg Meter vunenee gestanen. Dat gesäit een och op Fotoen, déi an den australesche Medie verëffentlecht goufen.
Souwuel den Airbus wéi och d'Boeing, déi vun engem Pushback-Gefier gezu gouf, hu missen eng Noutbremsung maachen. Dobäi gouf e Member vun der Kabinnecrew vum Jetstar-Fliger blesséiert.
D'Autoritéiten hunn eng Enquête lancéiert, fir d'Ursaach vum Tëschefall ze klären. Éischten Erkenntnisser no soll de Chauffer vum Pushback-Gefier d'Instruktioune vum Kontrolltuerm net respektéiert hunn. Wéinst dem Virfall koum et um Fluchhafe vu Sydney och zu Verspéidungen am Loftverkéier.
