De Villa Borg Trail féiert duerch eng Landschaft, déi virun allem duerch hir Rou an hir Natur bestécht. Amplaz vu vill Verkéier an Asphalt ass een hei op natierleche Weeër ënnerwee. Et geet duerch Bëscher, laanscht Dëmpelen, Wisen a Felder. De Buedem wiesselt, kleng Montéeën an Descente bréngen Ofwiesslung, an och d’Landschaft verännert sech permanent.
Mee natierlech ass d’Villa Borg selwer den Highlight vun der ganzer Géigend. Hei kritt een en Abléck an d’Liewe vun de Réimer virun ongeféier 2.000 Joer. D’Villa gouf no archeologesche Fuerschungen rekonstruéiert, an haut kann een sech do zimlech gutt virstellen, wéi esou eng réimesch Anlag ausgesinn huet. Et sinn net nëmmen d’Gebaier, déi interessant sinn. Och d’Gäert an déi ganz Anlag maachen d’Geschicht méi gräifbar. Et ass e bëssen esou, wéi wann een aus der haiteger Zäit eraustrëtt an e kuerze Bléck an d’Vergaangenheet kritt.
Haut kommen d’Leit awer net nëmme fir d’Geschicht heihinner. Fir déi eng ass et eng sportlech Erausfuerderung, fir déi aner eng flott Geleeënheet, d’Géigend op eng ganz aner Manéier ze entdecken. Ob eleng, mat Frënn oder mat der Famill - hei kann een e puer flott Stonnen dobausse verbréngen an dobäi nach e bëssen eppes léieren.
A vläicht ass et genee dës Kombinatioun, déi de Reiz ausmécht: Natur ënnert de Féiss, Geschicht virun den Aen an einfach Zäit fir ze trëppelen an ze entdecken.
