De franséische Champion stoung lescht Joer nach an der Halleffinall. Am neie Modus vun der Champions League sti si aktuell awer just mat enger Victoire, zwee Remisen an dräi Defaiten op der 25. Plaz. Dës Placéierung géif eng direkt Eliminatioun bedeiten. Deemno gëtt den Ausfluch op München net evident.
Dat souwisou net, well zu München an der Allianz Arena géint d’Bayern ze gewannen ass aktuell quasi onméiglech. D’Ekipp vum Vincent Kompany huet zanter dem 30. Mäerz 2024 keen Heemmatch méi verluer a krut an deene leschte sechs Partië kee Gol geschoss.
E Mëttwoch ass Liverpool, déi et op dësem Spilldag mat Real Madrid ze di kréien, de Favorit. D’Ekipp vun der Insel steet souwuel an der Premier League wéi och an der Champions League op der éischter Plaz. E Grond kéint den neien Trainer, den Arne Slot, sinn.
De Real Madrid muss géint Liverpool op alle Fall gewanne well och si sti mam Réck zu der Mauer. An der Tabell steet den Titelverdeedeger op enger Play-Off Plaz a riskéiert bei enger weiderer Defaite op eng Eliminatiounsplaz ze rutschen. Ee Spiller wäert awer net an de Fliger klammen. De Vinicius Junior huet eng Blessur um Uewerschenkel a wäert dem Real fir e puer Matcher feelen.
