D’Resultater wieren en Zeechen, dass sech déi vill Aarbecht géif lounen. D’Ekipp hätt gutt zesumme gehalen a mat gudde Leeschtungen iwwerzeegt.
Den Nationaltrainer Christophe Audot huet no de Kompetitiounen e positive Bilan gezunn: „J’avais des équipes de seigneurs... se sont comportés de manière exemplaire.“
Fir hien zielt net nëmmen d’Resultater, mee och, dass déi erfuere Schwëmmer déi Jonk konnte begleeden an déi vill fir d’Zukunft léieren: „C’est une école de l’humilité et j’adore ça dans cette compétition.“
Wéi den Trainer betount huet, war et fir d’Schwëmmer och kierperlech ustrengend, well et keng Méiglechkeet fir aktiv Erhuelung tëscht de Coursë gouf. Jiddereen hätt bis zum Schluss gekämpft.
„Jusqu’aux dernières médailles de bronze... tout le monde s’est battu jusqu’aux derniers mètres.“
D’Emma Barthel, déi un hiren éischte Spiller deelgeholl huet, huet um leschten Dag nach eng Sëlwermedail am Crowl geschwommen.
„Ech si richteg zefridden. Ech wollt onbedéngt nach eng Medail de leschten Dag. An ech hunn halt net geduecht, datt et zweet Plaz géif ginn, well ech hu gekämpft an ech hunn einfach alles ginn.“
Et war eng emotional Leeschtung: „Et huet gebrannt, mee ech hunn duerchgezunn.“
D’Medail huet fir d’Schwëmmerin eng grouss Bedeitung, waren et hir éischt Spiller vun de klenge Länner.
Och d’Jackie Banky kuckt zefridden op hir Leeschtungen zeréck: „Ech sinn a meng Course eragaangen. Ech hu mer gesot, et ass, wat et ass, ob ech elo Véierte ginn, Drëtten, Fënneften... an ech sinn einfach super frou, dass et opgaangen ass.“
Den Drock hätt si bewosst versicht, op der Säit ze loossen, dat hätt gehollef, fir méi fräi ze schwammen.
Besonnesch d’Equipe-Gefill an de Staffel-Courssen huet si am Interview ervirgestrach: „Mega, mat de Meedercher an haut mat de Jongen, super Ambiance.”
Eng gutt Leeschtung an der Staffel wier dacks méi wäertvoll wéi eng gutt Eenzelperformance.
