Dat heescht awer net, datt der Queen hire Gebuertsdag iwwergaange gëtt. Ufank Juni gëtt der Monarchin hiren Dag am grousse Stil nogefeiert. Nieft der traditioneller “Trooping of the Colour"-Parad gëtt iwwer véier Deeg net just de Gebuertsdag nogefeiert, mee och de 70. Anniversaire vun der Kinnigin hirer Kréinung - hire Platinjubiläum.
Der Kinnigin hiren Enkel de Prënz Harry war kuerz virun Ouschtere mat senger Fra Meghan fir déi éischte Kéier zanter hirem Récktrëtt vun hire royale Flichten erëm zeréck a Groussbritannien bei der Famill. An engem Interview sot de Prënz Harry viru kuerzem, seng Groussmamm wier an Héichform. Mee no esou ville Jore géing hie mengen, datt hir Gebuertsdeeg e bësse langweileg ginn. Si géif sech méi op hiren Trounjubiläum freeën.
