Rapatriementer si massiv an d'Luucht gaangen, Cotisatioune ginn erop

© Pit Everling
Och den ACL kritt d'Inflatioun ze spieren. Nodeems 13 Joer laang d'Cotisatiounen identesch bliwwe sinn, gëtt et hei vun 2023 un awer eng Hausse.
Den Automobilclub kuckt op mouvementéiert Méint zeréck. Wat virun allem opfält ass, datt d'Leit dëse Summer massiv gereest sinn. Eng beléift Destinatioun war zum Beispill Éisträich. Fir d'Alpeland goufe gutt 50% méi Vignettë verkaaft.
Allgemeng notéiert den ACL bei de Rapatriementer aus dem Ausland eng ganz staark Hausse.
Den Direkter Jean-Claude Juchem huet en Dënschdeg de Moien de Bilan gemaach. Rapatriementer aus Frankräich, Portugal oder Éisträich... virun allem dohi sinn d'Leit gefuer. Elo si mer bei den Zuele schonn eng 70% méi héich wéi d'lescht Joer ëm dës Zäit. Bis d'Enn vum Joer wäerte mer nach vill Autoen zeréck bréngen, esou den ACL-Direkter.

© Pit Everling
D'Héichsaison fir déi ronn 50 Depanneuren, Mecanicienen a Chauffeure geet elo mat de Wanterméint eréischt un, allgemeng gëtt et déi meescht Interventiounen nach ëmmer wéinst Batterien. Dem Automobilclub fält an deem Kontext op, datt de Fuerpark zu Lëtzebuerg ëmmer méi al gëtt. D'Leit kafe méi Occasioune wéi soss, wéinst laange Liwwerzäite bei Neiween.
D'Inflatioun kritt och de bal 90 Joer alen Automobilclub ferm ze spieren. Ënner anerem dowéinst ginn dat anert Joer d'Cotisatioune fir déi ronn 195.0000 Memberen erop, fir d'Couverture vu Lëtzebuerg vun 49 op 69€ a fir Europa vun 89€ op 119€ pro Joer. 13 Joer goufen déi Präisser net geännert.
Bei den Immatrikulatioune wieren d'Elektro-Ziler bis 2030 kaum ze realiséieren. Mam syntheteschen Diesel wiere massiv Aspuerunge méiglech an dofir sollt dee politesch a steierlech méi gefërdert ginn, fënnt den ACL.