Nei Variant vu Käerjenger Contournement kéint Realitéit ginn
Am Juli zejoert hat d'Regierung sech fir eng nei Variant fir de Käerjenger Contournement ausgeschwat. Bei där bräicht de Bobësch net zerschnidden ze ginn.
Dofir misst d'Entreprise "Saint Gobain" relogéiert ginn. Iwwer hiren Terrain soll déi nei Ëmgeeungsstrooss goen.
An enger Reunioun um Méindeg tëscht de Ministere Backes, Delles a Wilmes gouf dës Variant nach eemol festgehalen. Fir dëse Contournement bauen ze kënnen, huet den Ëmweltminister Serge Wilmes eng entspriechend Autorisatioun ënnerschriwwen, wou verschidden Ëmweltoplagen a Kompensatiounsmesuren ëmgesat musse ginn.
Déi lescht Propos, déi am Juli zejoert festgehale gouf, géif tëscht dem Bobësch an der Gare vu Käerjeng/Suessem duerchféieren. Domadder wären de Bësch an d'Natura 2000 Zone bal net impaktéiert.
Spéitstens Ufank 2025 sollen déi éischt Baggere rullen.
