Warhol, Lichtenstein, Manrique, Koons oder Rauschenberg sinn Nimm vu ganz grousse Kënschtler, déi zesummen an enger ganz spezieller Expo an op eng ganz speziell Manéier an der Metzeschmelz ausgestallt ginn. Och an der Konscht ginn et Publikumsmagnéiter. An deene meeschte Fäll sinn dat grouss Nimm, déi ee kennt.
Wa Wierker vun dëse Kënschtler ausgestallt ginn, kann ee sécher sinn, dass Leit kucke kommen. Am Kader vun Esch2022 mécht eng Ausstellung mat esou groussen Nimm dëse Weekend hir Dieren op, an dat net an enger Galerie oder engem Musée, mä an der Metzeschmelz zu Esch/Uelzecht. Do virdrun ass awer nach vill Aarbecht. De Stëbs muss erausgekiert an d’Konscht eragerullt ginn. Well et si grouss Wierker vu groussen Artisten.
Art Cars heescht d’Serie vun engem däitschen Autoskonstrukteur, déi 1975 vum Hervé Poulin an d’Liewe geruff gi ass. Et ass awer Konscht, déi beweegt, an dat mat iwwer 200 km/h. Verschidde Wierker sinn nämlech och an d’Course op 24 Stonne vu Le Mans geschéckt ginn, an och mat deem deiere Lack si se net geschount ginn.
19 Wierker ëmfaast d’Kollektioun vun den Art Car, an zu Esch si vum 7. Mee bis de 14. Juni 9 Stéck ausgestallt, an dat ass exzeptionell a gouf et an där Form nëmmen ee Mol ausserhalb vu München, nämlech zu London 2012 bei Olympia.
Wie sech déi flott Stecker wëll ukucke goen, muss sech virdrun um Site aschreiwen.
Et ass gratis a fir all Konschtfrënd oder Autosfrënd derwäert.
