Obwuel d’amerikanesch Presidentschaftswale staark op Perséinlechkeete bezu sinn, also den eenzele Kandidat en am Verglach mat villen europäesche Länner vill méi groussen Afloss op d’Wal-Decisioun vum eenzele Wieler huet, ginn et eng Partie Sujeten, déi och e groussen Afloss op d’Decisioun vun de Wieler hunn.
Dem Politikwëssenschaftler Jared Sonnicksen no ass d’Wirtschaft ee Sujet, dee bei all Presidentschaftswal matspillt, esouwuel bei den demokrateschen ewéi och bei de republikanesche Wieler. Hei misst een awer drop oppassen, op wéi en Aspekt vun der Ekonomie d’Leit besonnesch staark géife kucken. Geet et zum Beispill ëm d’Produktivitéit vun der gesamter Wirtschaft, d’Beschäftegungszuelen an engem bestëmmte Secteur oder ëm d’Inflatioun.
Da misst ee bedenken, dass béid Partien an hirem Walkampf verschidden Aspekter vun der Ekonomie ënnerschiddlech staark betounen. D’Republikaner géifen zum Beispill ganz staark d’Kaart vun den héije Bensinnspräisser spillen, fir dem Joe Biden seng Presidentschaft ze attackéieren.
Op der anerer Säit wier d’Lutte géint de Klimawandel e Sujet, dee fir d’Demokraten eng besonnesch wichteg Roll wäert spillen.
Ma ee Sujet, dee bei dëse Walen eng besonnesch wichteg Roll wäert spillen, ass dem Jared Sonnicksen no dee vun der Awanderung. Dëse géif eng ganz zentral Roll am Donald Trump senger Campagne spillen. Hie géif déi illegal Awanderung fir eng ganz Rei vun anerer Probleemer responsabel maachen, sief et an der Wirtschaft oder bei de Kriminalitéitsstatistiken.
Schliisslech géif et och ëm d’Roll vun den USA an der Welt goen. Sollen d’USA sech aus der internationaler Politik zeréckzéien, wéi et am berüümte Slogan “America First” vum Donald Trump ukléngt oder weider hier Roll als global Uerdnungsmuecht anhuelen, ewéi d’Demokraten dat virgesinn. Mat Bléck op d’Kircher an der Ukrain an am Noen Osten mécht dat des US-Walen aus enger europäescher Perspektiv besonnesch interessant.
