D’Ëmfroen an d’Prognosen zu den US-Wale gi spéitstens zanterdeem den Donald Trump 2016 entgéint allem, wat virausgesot gouf, géint d’Hillary Clinton gewonnen huet, mat enger grousser Skepsis gesinn. Et wier och richteg, sech net blann op d’Ëmfroen ze verloossen, erkläert de Politikwëssenschaftler Jared Sonnicksen. Dës wieren am Allgemenge wuel zouverlässeg, allerdéngs géifen eng Partie Facteuren dofir suergen, dass d’Ëmfroen d’Realitéit ni ganz kéinten zeréckspigelen. Nieft den übleche Feelerquote wieren dat och Saachen, iwwert déi een nëmme kéint spekuléieren, zum Beispill doriwwer, wéi eng Wieler op d’Ëmfroen äntweren a wéi eng net.
E weidere Facteur, dee Prognose vun den US-Presidentielle besonnesch schwéier géif maachen, wier den amerikanesche Walsystem, bei deem een entweder alleguer d’Walleit aus engem Bundesstaat kritt oder keen. Dat wier och de Grond gewiescht, dass kaum een d’Victoire vum Donald Trump virun aacht Joer virausgesot huet. D’Prognose wieren a souwäit richteg gewiescht, dass méi Leit d’Hillary Clinton gewielt hunn. Ma um Enn hat den Donald Trump méi Stëmmen am Electoral College.
