D'Regierung huet Transparenz versprach, ma huet bis ewell just Intransparenz, Iwwerhieflechkeet, Arroganz an och ganz dacks Konzeptlosegkeet geliwwert.

Zwee rezent Beispiller dofir wären d'Dossiere Google a Schwéngspescht. Dat sot d'Fraktiounspresidentin Martine Hansen op enger Pressekonferenz, déi ënnert der Form vun engem "Oppositiounsbriefing" vun elo u ganz reegelméisseg soll ofgehale ginn.

Ugefaange mam Dossier Google, wou d'CSV schonn immens vill Froe gestallt an och eng Aktualitéitsstonn dozou an der Chamber initiéiert hätt. Bis haut hätt een keng Äntwerte kritt an dat wär een Zeeche vun Arroganz un der Muecht an e Mangel un Respekt vis-à-vis vun der Chamber, erkläert d'Fraktiounscheffin Martine Hansen.

Wann eng Regierung de rouden Tapis ausrullt fir Google, dat mécht se jo net fir all Betrib. Wann eng Regierung dann och nach grouss vun Nohaltegkeet schwätzt, wat jo wichteg ass, da misst eng Regierung och d'Froe beäntwerten, déi sech am Kader vun dem Projet stellen, déi d'Léit hunn an déi mir hunn, iwwer d'Ëmwelt, iwwer de Waasserverbrauch, iwwer den Energieverbrauch.

Och am Dossier afrikanesch Schwéngspescht wär geschlof ginn.

Elo op eemol ass alles dréngend. Vu September u gëtt et déi Schwéngspescht an der Belsch. D'Belsch läit net bei Honolulu, mee d'Belsch grenzt u Lëtzebuerg an d'Schwéngspescht ass jo och net vum Himmel gefall.

Besonnesch déi Gréng a virop de Mobilitéitsminister François Bausch stoungen an der Kritik. Schonn an der Srel-Affär wier den Minister an éischter an an zweeter Instanz veruerteelt ginn, elo misst hie sech awer och nach fir eng weider  Amëschung an d'Justiz veräntwerten, fuerdert de Frank Engel an evoquéiert eng Demissioun vum Minister, deen an dëser Form net méi "tragbar" wär.

Hannergrond ass d'Deviatioun vun engem Schantje vu Ponts et Chaussées op der Hëttermillen am Joer 2017, wou et eng Rei Motorradsaccidenter gouf. Doropshin hat den éischte Substitut vum Parquet d'Administratioun opgefuerdert, fir d'Motocyclisten, déi do gefall waren, z'entschiedegen.

De grénge Minister hätt doropshin d'Procureur Général ugeschriwwen a sech iwwerrascht gewisen iwwer dës Decisioun.

Dëst wär awer eng Form vun Amëschung an d'Justiz, déi et bis ewell nach net ginn hätt, erkläert den CSV-Parteipresident. Wann esou eppes viru 5 an engem hallwe Joer geschitt wär, da wär no Demissioune gejaut ginn, esou de Frank Engel.

An dësem Fall géing d'CSV keng Demissioun fuerderen, well de Minister Bausch souwisou op sengem Stull géing peche bleiwen, sou de Frank Engel.

Keng Reaktioun vum François Bausch

Op Nofro hin, krut RTL matgedeelt, dass de Minister François Bausch den Ament net weider wëll op dës Aussoe vum CSV-Parteipresident Frank Engel reagéieren. D'Conseillère am zoustännege Ministère Dany Frank huet donieft och erkläert, dass net vun enger Amëschung kéint rieds sinn, et wär eng legitim Nofro iwwer d'Virgoensweis vum Parquet vum Minister Bausch gewiescht.

Eisen Informatiounen no géing d'Prozedur fir d'Motocyclisten z'entschiedegen, déi op dem Schantjen zu Schued koumen, iwwerdeems scho lafen.

RTL

Affär Lenzweiler

No engem Reportage ugangs der Woch bei eis op der Antenn huet d'CSV dann och d'Fro opgeworf, firwat een eventuell eng Holzverbrennungsanlag zu Lenzweiler am Norde wéilt opriichten.

D'Entreprise Tarkett zesumme mat Engie hunn Enn lescht Joer eng Kommodo-Prozedur lancéiert, d'Gemenge Klierf a Wëntger hunn hire Veto schonn ageluecht, an awer géing een aus den zoustännege Ministèren héieren, dass d'Zentral kéint autoriséiert ginn. D'Ministere géingen net reagéieren an dofir freet sech d'CSV, wéi et kéint sinn, dass engersäits permanent vun Nohaltegkeet, CO2-Emissiounen an Emissiouns-Reduktioune géing geschwat ginn an anerersäits dann esou eng Infrastruktur kéint entstoen, déi alles anescht wéi nohalteg wär, sou de Frank Engel:

Mir kréien dach permanent eppes vun Nohaltegkeet, vu CO2- Emissiounen, vun Emmissiounsreduktioun, vu Klimaziler an sou virun an sou weider gezielt. Mir falen an d'Schwächt wann d'Greta Thunberg an engem Ëmkrees vu 500 Kilometer ronderëm Lëtzebuerg opdaucht, mir sinn der Meenung, mir missten nach méi héich Ziler entwéckelen, wéi mer der elo schonn net erfëllen. An da gi mer matten op d'Wiss, an den héijen Norde vum Land, eng Infrastruktur an d'A faassen, déi eigentlech den Géigendeel wier vun dem wat op iergendeng Manéier kéint als nohalteg bezeechent ginn.“