Ugefaange mat engem Déifstall aus engem Supermarché an der Uelzechtstrooss zu Esch, e Mëttwoch géint 14:30 Auer. Eng Fra hätt hei zwou Gedrenksbéchse matgeholl ouni ze bezuelen. Wéi si am Beräich vum Escher Gemengenhaus vun enger Policepatrull fonnt gouf, huet si sech immens onkooperativ gewisen an engem vun de Beamte souguer an den Aarm gebass. Hie gouf medezinesch am Spidol versuergt. D'Fra krut e Protokoll wéinst Déifstall mat Gewalt a wéinst Rebellioun géint Policebeamten.
An der Rue Joseph Juck an der Stad gouf et am fréien Owend dann nach e Sträit virun engem Café tëschent zwee alkoholiséierte Männer. Ee vun hinnen hätt dobäi e Messer gezu fir deene aneren anzeschüchteren, wouropshin deen awer no der Kléng gegraff a sech dobäi selwer un de Hand blesséiert huet. Policebeamten hunn d'Männer vunenee getrennt an d'Messer séchergestallt. Déi blesséiert Persoun wollt sech net an engem Spidol behandele loossen.
Ee vun den zwee hat sech der Police net berouegt a koum an den Arrest, bei him gouf iwwerdeems och eng kleng Quantitéit Haschisch fonnt.
Och am Garer Quartier un der Kräizung tëschent der Rue d'Épernay an der Rue de Reims koum et kuerz no 22 Auer zu enger Ausenanersetzung tëschent zwee Männer, déi vuneneen hu musse getrennt ginn a bei där nees ee vun hinnen onkooperativ war an d'Poliziste menacéiert a beleidegt huet. Och hie koum temporär ënner Arrest.
Da gouf et nach en Asaz um leschten Owend vun der Schueberfouer: E Mann hat hei zwou Frae menacéiert an ugebläert. Wéi hie vun engem Sécherheetsmann opgefuerdert gouf, opzehalen, huet en dëse mat enger Fläsch am Gesiicht blesséiert. Och géigeniwwer der Police wollt hie sech net berouegen an huet rebelléiert. Hie koum an den Arrest an de Virfall gouf protokolléiert.
En Donneschdeg de Moie géint 6:25 Auer krut d'Police dunn eng Kläpperei am Beräich vun der Avenue de la Faïencerie um Lampertsbierg gemellt. Op der Plaz hunn d'Beamten e Mann fonnt, deen op der Strooss louch a blesséiert war. Éischten Informatiounen no sollen dräi bis véier Persounen zerklappt gi sinn, ier dës ze Fouss a Ricthung Allée Scheffer geflücht sinn. De Blesséierte koum fir eng Kontroll an d'Spidol, eng enquête leeft.
