Fir déi éischte Kéier ënnerstëtzt de Staat Leit, déi fräiwëlleg am Kader vum Dry January fir ee Mount op Alkohol verzichten. Esou een “Dry January” hätt kuerzfristeg a laangfristeg positiv Effekter op d’Gesondheet, wéi zum Beispill Gewiichtsverloscht, eng besser Haut a bessere Schlof, esou d’Aka Bamberger, Fachberoderin fir Suchtpräventioun beim CNAPA. Si war e Freideg de Moien eis Invitée vun der Redaktioun.
De Santésministère huet eng Lizenz kaaft, duerch déi d’App, fir beim “Dry January” matzemaachen, hei am Land disponibel ginn ass. Bis elo hätte sech eng 600 Leit d’App erof gelueden, ma et géifen der nach ëmmer dobäi kommen.
Den “Dry January” wier hei zu Lëtzebuerg och net vu Muttwëll, well Lëtzebuerg wier een Héichkonsumland: An der Moyenne géife pro Kapp 11 Liter rengen Alkohol zu Lëtzebuerg konsuméiert ginn, dat ass den Equivalent vun 120 Fläsche wäisse Wäin. Do mat gezielt sinn och Leit, déi keen Alkohol drénken, wéi Kanner.
Op d’Kritik vun der Horesca ugeschwat sot d’Aka Bamberger, datt d’Zil vum “Dry January” net wier, datt d’Leit sech doheem aspären, mee grad eraus an d’Restauranten a Caféen ginn, an do dann eng net-alkoholesch Consommatioun bestellen.
Rendez-vous fir den Interview mam Invité vun der Redaktioun all Dag vu méindes bis freides um 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d’Emissioun dono och am Replay ze fannen.
