E weidere Bus aus Lëtzebuerg ass aktuell an der Ukrain aktiv. Et handelt sech heibäi ëm e fréiere Bus vun der Stad Lëtzebuerg. An der Regioun Rivne gëtt de Bus als Schülertransport agesat. Rivne ass eng Regioun an der Ukrain, wou vill Familljen aus der Ostukrain wärend dem Krich hi geflücht sinn. Duerch de Bus kënnen d’Kanner hei nees an d’Schoul goen.
An engem Post op der Facebook Säit vum Inna Yaremenko, Vizepresidentin vun der Organisatioun “LUkraine”, gesäit een de Bus am Schnéi stoen.
Zanter 2023 ënnerstëtzt d’Stad Lëtzebuerg d’Aktioun “School buses for Ukraine”. Dëst ass eng Solidaritéitscampagne, déi vun der Europäescher Kommissioun an d’Liewe geruff an ënnerstëtzt gouf.
Vum Anne Calteux, déi d’Europäesch Kommissioun hei zu Lëtzebuerg vertrëtt, heescht et, datt Lëtzebuerg proportionell zu senger Gréisst dat Land wär, dat am allermeeschte Busser an d’Ukrain geschéckt hätt.
E puer Zuelen erausgegraff:
Gepanzert Ambulanzen an ënner anerem Material vum CGDIS goufen och schonn an d’Krichsregioune geschéckt.
De 4. November 2023 war d’EU Kommissiounspresidentin Ursula von der Leyen op Besuch zu Kiew. Mat dobäi war d’ukrainesch First Lady, Olena Selenska. Deemools goufen 370 Schoulbusser, déi am Kader vun der Aktioun “School buses for Ukraine” zesummekoumen, un ukrainesch Gemengen iwwerginn.
Schätzungen no ginn et an der Ukrain eng 5,7 Millioune Kanner am schoulflichtegen Alter. D’EU-Kommissioun huet 1,5 Millioune Schoulbicher un d’Ukrain gespent.
