De Kanner d’Méiglechkeet ginn, hirem Rhythmus no ze léieren an ze schaffen, dëst ass der Joffer Vicky Pundel ganz wichteg. “All Kand kënnt an d’Schoul a brauch Hëllef. Dowéinst si si jo hei fir ze léieren”, sou d’Schouljoffer am RTL-Interview.
“Et soll keen ausgeschloss ginn”, erkläert d’Martine Kirsch, Presidentin vum ZEFI, Zesumme fir Inklusioun. “An der Klass goufen och eng ganz Partie Adaptatioune gemaach. Sou ka jidderee seng Plaz hei fannen. Jidderee ka sengem Rhythmus ugepasst matmaachen. Op d’Stäerkte vun all Kand gëtt opgebaut”, sou d’Presidentin.
An der Klass zu Äischen si 15 Schüler a Schülerinnen. Et ass de Cycle 3.2, also dat fréiert 4. Schouljoer. Siwe Kanner brauchen individuell Hëllef. Mat enger Otemübung fänkt de Cours bei der Joffer Pundel un.
En Diplom an e Scheck vun 1.000 Euro hunn d’Kanner an hir Schouljoffer vun ZEFI e Méindeg 15.Dezember kritt.
