Wéi d'US-Raumfaartagence en Dënschdeg matgedeelt huet, konnt d'Ausmooss vum Aschlag virun zwou Wochen ausgerechent ginn. De Krater, deen entstanen ass, huet en Duerchmiesser vun 18 Meter an ass 3 Meter déif. D'Experten hu sech bei hire Berechnungen op Grondlage vu Schied baséiert, déi de Krater hannerlooss huet.
D'Opname vun der Nasa goufen den 11. an 12. August vun der US-Sond Lunar Reconnaissance Orbiter (LRO), déi de Mound ëmkreest, gemaach. Se weisen den Aschlag, deen de 5. August op der Surface vum Mound entstanen ass duerch e Stéck vun enger Falcon-9-Rakéit. D'Nasa wëll an Zukunft eng Weltraumbasis um Mound opriichten, Erkenntnesser iwwer méiglech Kollisioune mat Weltraumschrott sinn dowéinst wichteg.
D'SpaceX-Rakéit hat den 9. Januar 2025 zwee Apparater an de Weltraum transportéiert, déi fir Moundlandungen néideg sinn. Den Undriff vun der Rakéit ass op der Äerd gelant, den ieweschten Deel ass am All bliwwen. Duerch eng Mëschung aus Sonnenaktivitéit a Schwéierkraaft wier d'Stéck vun der Rakéit vu senger berechenter Streck ofkomm, sou dass se net gewollt a Richtung vum Mound geflunn ass. Esou hat déi zoustänneg SpaceX-Directrice Julianna Scheiman den Opprall erkläert.
Um Mound schloen zwar reegelméisseg Meteoritten an, Kollisioune mat Stécker vu Rakéiten oder anerem Weltraumschrott sinn awer méi seelen. Schätzunge vun der Europäescher Weltraumagence Esa no sinn den Ament méi wéi 46.000 Stécker Weltraumschrott an der Äerdëmlafbunn, déi zesumme ronn 17.000 Tonne weien.
Déi vun der Nasa verëffentlecht Opname sinn net déi éischt vum Aschlag um Mound. D'südkoreanesch Raumfaartagence hat schonn de 6. August Biller presentéiert.
