Iwwerall a Spuenien hunn d’Leit vu Freed gedanzt, gejaut a gekrasch: Nëmmen zwee Deeg virun Hellegowend huet déi weltberüümt Chrëschtdagslotterie sëllege Leit a Spuenien begléckt an dat mat enger Rekordzomm vun 2,77 Milliarden Euro - 70 Millioune méi wéi d’lescht Joer.
Déi virun iwwer 200 Joer gegrënnt Lotterie gëllt als eelst vun der Welt a gëtt wéinst der Gesamtzomm och als gréisst Tombola bezeechent. Eleng den Haaptgewënn, den “El Gordo”, also “den Décken”, bei deem ee véier Milliounen Euro just mat engem Lous gewanne kann, gëtt dëst Joer 198 Mol ausbezuelt - fënnef Mol méi wéi 2024. Hannergrond ass de spezielle System: All eenzel vun den 100.000 Lousnummere gëtt wéinst der Hausse un Nofro all Joer ëmmer méi dacks opgedeelt a verkaf.
“Den Décken” huet dëst Joer ronn annerhallef Stonn op sech waarde gelooss. Um Punkt 10.44 Auer gouf am Operenhaus Teatro Real zu Madrid d’Glécksnummer 79.432 gezunn a vun zwou Schülerinne vum Internat San Ildefonso virgesongen. “En ass do, den Décken ass do!”, huet d’Moderatrice vun RTVE geruff, deen de Spektakel iwwer e puer Stonnen iwwerdroen huet.
De grousse Geldseege goung ënnert anerem och u Leit zu Madrid, mä virun allem u méi aarm Géigende vun der Regioun León, déi dëst Joer ënner schwéiere Bëschbränn gelidden hunn. Ee groussen Deel vum Haaptgewënn geet un Awunner vu La Bañeza ronn 300 Kilometer nordwestlech vu Madrid: 468 Milliounen Euro. D’Sue ginn an der Gemeng dréngend gebraucht. Nieft de Bëschbränn huet nämlech eng grouss Zockerfabrick an der Gemeng zougemaach, déi bal 1.000 Aarbechtsplaze kascht huet.
Virun den RTVE-Kameraen hu véier jonk Meedercher sech iwwer de Gewënn gefreet, där hir Familljen e puer Louser vum Haaptgewënn kaf haten. “Mir hunn hei wierklech eng haart Zäit hannert eis. Elo gëtt gefeiert!”, hu si vu Freed geruff. Eleng d’Spiller, d’Trainer an d’Fonctionnairë vum klenge lokale Futtballveräin La Bañeza kréien am Ganzen 268 Milliounen Euro. “Elo kéinte mir de Kylian Mbappé bei eis huelen”, huet een de Geck gemaach.
Den zweete Präis iwwer 1,25 Millioune war scho 15 Minutten nom Ufank vun der Lotterie gezu ginn a goung un d’Nummer 70.048. Hei hu sech séier vill Leit mat Schampesfläsche virum Kiosk zu Madrid versammelt, déi all déi 198 Oploe vum Gléckslous kaf haten. “Dat ass den Hummer, d’Keefer si majoritär Leit aus der Noperschaft”, sot de Bedreiwer vum Kiosk.
Dat wier och ganz am Sënn vum Jesús Huerta, dem Chef vun der spuenescher Lotteriegesellschaft Loterias y Apuestas del Estado. Et géing ee Suen ëmverdeelen a sozial Ongläichheeten ausgläichen, well all Joer nees vill Leit an Nout ënner de Gewënner wieren.
Och zu Madrid huet sech e Mann, dee keng Aarbecht méi huet, iwwer 20.000 Euro fir en Zéngtellous vum véierte Präis gefreet. “Ech wäert domat Scholden ofbezuelen a vläicht déi éischt Vakanz mat menger Fra no fënnef Joer maachen”, sot de 44 Joer ale Juan Manuel der Dpa.
Verschiddener setzen hire Gewënn och fir d’Wuel vun der Allgemengheet an: 1928 zum Beispill hat de Bernardo Cerezo zu Carmona de Bau vun engem Theater finanzéiert, 1932 huet den Ángel Oliván zu Calahorra e Spidol an eng Schoul mat sengem Gewënn gebaut.
