© pixabay.com
Smalltalk gehéiert zu eisem Alldag. Ma ville Leit fält et schwéier ongezwonge Gespréicher unzefänken an um Lafen ze halen. Ma do ginn et awer déi oder aner Sätz déi engem hëllefe kënnen dee peinleche Moment vum verkrampft beienaner Stoen oder Sëtzen ze ëmgoen a locker an e Gespréich ze kommen.
Wéi war Ären Dag bis ewell? Dës einfach Fro passt bei all Dageszäit an zu all Ulass. Se ass perséinlech genuch fir ze weisen, dass een Interessi huet awer net ze vill intim fir desagreabel ze sinn. Se gëtt Ärem Géigeniwwer d'Fräiheet sou ausféierlech oder kuerz ze äntwere wéi et sech grad richteg ufillt an et kann een op bal all Aspekt vun der Äntwert uknäppen.
Hutt Dir Recommandatiounen fir e Restaurant an dëser Géigend? Dës Fro fonctionéiert iwwerall - egal ob an der Stad oder an der Vakanz. Se ass praktesch, onverfänglech a bal jiddereen huet eng Meenung dozou. Wann een d'Gespréich mat Aarbechtskolleegen an der Mëttegstonn ufänkt, kann ee se no hirem Liblingsrestaurant froen. Natierlech elo net all Dag bei deene selwechten. An der Vakanz kann ee sech domadder e puer Geheimtippe gi loossen déi net am Guide oder um Internet stinn. De Virdeel vun dëser Fro ass, dass se Interessi un der Expertise vun Ärem Vis-à-vis weist a sech doduerch och weider Gespréichstheme wéi Virléifte beim Iessen oder Rees-Erfarungen entwéckele kënnen.
Wouhi geet dann déi nächst Rees? Och eng ganz einfach Fro déi bei bal jidderengem fonctionéiert fir e Gespréich unzefänken. Och bei Leit déi seele reesen. Donieft wierkt se ni opdrénglech well Reesen e Sujet ass dee positiv ass. Och ouni konkret Rees-Pläng féiert déi Fro dacks zu Gespréicher wéi Wonsch-Ziler oder vergaangen Erliefnesser.
Ech hu viru kuerzem dëst oder dat gemaach. Hutt Dir dat och scho mol probéiert? Deelt eng kleng Erfarung aus dem Alldag - egal ob dat e Besuch am Restaurant, eng nei App oder e Spadséiergang am Park - a verbann se mat enger Fro. Dëse Saz ass sou effikass well e perséinlech ass ouni awer opdrénglech ze wierken a gläichzäiteg eng Bréck zum Vis-à-vis schléit. E léist sech donieft och ouni Méi u bal all Situatioun upassen.
Mat dëse puer Sätz dierft deemno engem gelongene Smalltalk näischt méi am Wee stoe well heiansdo kënnt een net laanscht déi sougenannten iwwerflächlech Gespréicher, schonn eleng aus Héiflechkeet.
