Den Direkter vun der Santé war e Mëttwoch eisen Invité vun der Redaktioun.

Éischter zefridde weist sech den Direkter vun der Santé, wat déi aktuell Situatioun vu Corona-Infizéierten hei am Land ugeet.

Manner wéi 20 stieche sech de Moment offiziell den Dag un. D'Zuele vun den Infizéierte ginn erof, d'Zuel vun de Patienten an de Spideeler och. Eng zweet Infektiounswell wär awer méiglech, däers misst ee sech bewosst sinn. Dat seet den Dr. Jean Claude Schmit. Hie war eisen Invité vun der Redaktioun.

Wou stiechen d'Leit sech un? Dat ass meeschtens net ze retracéieren. Dacks awer hätt ee sech bei engem Kranken ugestach, sief et an der Famill oder op der Aarbecht.

Well d'Zuel vun den neien Infektiounen erofgaangen ass, gëtt zanter gutt enger Woch nees de Kontakt-Tracing gemaach, d'Kontakter vun engem Infizéierte ginn also noverfollegt. Den Ament wär dat relativ einfach. Dat geschitt iwwer fräiwëlleg Telefons-Interviewen.
Eng Tracing-App kéint sécher hëllefen, well sech d'Leit net ëmmer un all Kontakt géifen erënneren oder wéilten erënneren. Den Dateschutz géif do Bedenke maachen. D'Leit géife meeschtens beim analogen Noverfollge ganz gutt matschaffen. Bis zu 90, 100 Infektiounen den Dag kéint ee retracéieren. Dono géif et schwiereg ginn.

Hat een enke Kontakt, gëtt ee 7 Deeg a Quarantän gesat, keng 14 méi. Nom 5. Dag gëtt elo en Test gemaach. Ass deen negativ, kënnen d'Leit nom 7. Dag eraus aus der Quarantän.

D'Lëtzebuerger Populatioun an d'Fronatlierë kënne jo geschwë flächendeckend getest ginn. Déi Zuelen, déi do eraus kommen, sinn interessant ze wëssen, seet den Dr. Schmit, mä déi praktesch Konsequenz wär, datt wann ee positiv ass, gëtt een aus dem Circuit erausgeholl, et stécht ee kee méi un an d'Kontakter ginn noverfollegt.

Wat Anti-Kierper-Tester ugeet, do misst een oppassen. Et géif technesch Lacunë ginn an et wier a nach ze fréi. Zu dësem Zäitpunkt an der Pandemie géife se näischt bréngen. Et wieren awer esou Tester bestallt, fir se méi spéit anzesetzen.

Mir hunn den Direkter vun der Santé och op déi selwer gebitzte Masken ugeschwat. Wat daache se? Dat hänkt vun der Qualitéit vum Stoff of, wéi duerchlässeg deen ass. D'OP-Maske si getest, hu gewësse Standarden... am Zweiwelsfall soll een op déi chirurgesch Masken zréckgräifen. Do muss een och ëmmer déi faarweg Säit no baussen undoen.

Invité vun der Redaktioun: Dr. Jean-Claude Schmit

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.