E Sonndeg ass d'Mandy Minella zu Tyler am US-Bundesstaat Texas an der Finall ugetrueden.

Hei ass d'Lëtzebuerger Nummer 1 favoriséiert géint d'US-Amerikanerin Alexa Glatch an de Match gaangen. Vun Ufank un huet d'Spillerin vun der Spora hir Géignerin ënner Drock gesat, soudatt si den 1. Saz mat 6:4 fir sech entscheede konnt.

16. ITF-Titel fir Mandy Minella/Reportage Franky Hippert

Am 2. Saz dunn een ähnlecht Bild. Et goung hin an hier, ma no knapp annerhallwer Stonn Spillzäit hat d'Mandy Minella hiren éischte Matchball. Dësen huet si dunn och souverän genotzt an d'Partie um Enn an 2 Sätz zweemol mat 6:4 entscheeden.

Domat konnt si den ITF-Tournoi zu Tyler an Texas gewannen a wäert domat am WTA-Ranking vun der aktueller 169. Positioun ee Sprong vu ronn 30 Plazen no vir guttmaachen. Et war déi éischt Finall dëst Joer am Eenzel, déi si dann och fir sech entscheede konnt.

Fir d'Mandy Minella war et de 16. ITF-Titel an hirer Karriär. Et ass och deen, mat 80 Dausend Dollar, bis dato héchst-dotéierten Tournoi, deen d'Mandy Minella op der ITF-Tour konnt gewannen. Just virun 3 Joer war et um WTA-Circuit mam 125er zu Bol a Kroatien nach méi e groussen Tournoi. An der Weltranglëscht mécht si elo e Sprong vun 32 Plazen a steet elo op der Plaz 137.