En Dënschdegowend konnt de Veräin vum Lëtzebuerger Gérard Lopez an der 1/8-Finall vun der Coupe de la Ligue eng 3:0-Auswäertsvictoire feieren.

Méindeg

An der drëtter däitscher Liga war et um Méindeg den Owend een 2:2 tëscht dem Jeff Saibene senger Ekipp an 1860 München. Ingolstadt bleift den 2. an der Tabell, 1860 ass op der 11. Plaz.

Sonndeg

An der Schwäizer Super League hunn d’Young Boys Bern mam Christopher Martins 0:0 zu Lugano gespillt. De Lëtzebuerger stoung 90 Minutten um Terrain. An der 77 Minutt ass hie mat enger gieler Kaart verwarnt ginn.

An der Ukrain huet um Sonndeg de Mëtteg de Tim Hall mat Karpaty Lwiw 1:2 zu Poltawa géint Worskla verluer. De Spiller vun der FLF-Formatioun stoung iwwert déi 90 Minutten um Terrain a krut an der 53. Minutt eng Giel Kaart. De Marvin Martins stoung iwwerdeems net am Kader.

Dynamo Kiew huet no 90 Minutten auswäerts mat 1:0 géint Desna Tschernihiw gewonnen. Genee wéi de Marvin Martins bei Lwiw stoung bei Kiew och de Gerson Rodgrigues net am Kader vu senger Ekipp.

Samschdeg

An der 3. Liga an Däitschland gouf et um 19. Spilldag eng Auswäertsvictoire fir Waldhof Mannheim zu Zwickau. Den decisive Gol fir d'Ekipp aus dem Rhein-Neckar huet de Maurice Deville geschoss. Dem Lëtzebuerger säi Gol aus der 24. Minutt ass duergaangen, fir 3 Punkte mat op Mannheim ze huelen.

De Laurent Jans konnt op en Neits mat enger zolitter Leeschtung an der däitscher Bundesliga iwwerzeegen. De Kapitän vun de Roude Léiwe stoung beim 1:1 vu Paderborn géint Union Berlin déi 90 Minutten iwwer um Terrain. De Leandro Barreiro koum bei der 0:4-Néierlag vu Mainz géint Dortmund net an den Asaz. Hien huet op der Bänk misse Plaz huelen.

Royal Excelsior Virton, de Club vum Investisseur Flavio Becca huet doheem 3:1 géint Lommel gewonnen. Beim Erfolleg ware mam Kevin Malget, Anthony Moris, Dave Turpel an Aurélien Joachim véier Lëtzebuerger am Asaz. Virton ass an der zweethéchster belscher Divisioun elo an der Tabell den 2.

An der 2. Bundesliga huet de Karlsruher SC fir de Kont vum 17. Spilldag eng batter Heemnéierlag géint Greuther Fürth missen astiechen. Beim 1:5 souz de Lëtzebuerger Nationalspiller Dirk Carlson déi 90 Minutten iwwer op der Bänk.

An der ieweschter Liga op Zypern gouf et eng 2:0-Victoire fir Apollon Limassol. Hei war de Lëtzebuerger Vahid Selimonvic de komplette Match iwwer fir am Asaz.

Freideg

An der Eerste Divisie an Holland hat  Maastricht mam Enes Mahmutovic e Freideg kee gudden Owend erwëscht. Fir de Kont vum 18. Spilldag huet ee mat 1:4 beim FC Volendam verluer. De Lëtzebuerger stoung déi 90 Minutten iwwer um Terrain.

An der Ligue 2 a Frankräich stoung de Vincent Thill e Freideg den Owend net am Kader vun Orléans. De Veräi vum Lëtzebuerger huet sech misse mat 2:3 zu Le Mans geschloe ginn. Orléans steet weider op der leschter Plaz an der Tabell an huet duerch dës Néierlag d'Chance verpasst, fir de Réckstand no vir ze verklengeren.

An der Ligue 1 a Frankräich huet Lille, d'Ekipp vum President Gérard Lopez, sech mat 2:1 géint Montpellier duerchgesat. Lille huet doduerch déi 3. Plaz an der Tabell gefestegt.