Mat 20,92 Meter huet de Lëtzebuerger Champion schonn am éischte Versuch seng bescht Distanz realiséiert. Dono koumen 20,49 Meter an een ongültege Stouss, géint deen den 29 Joer ale Bielesser Protest ageluecht huet. Beschten Athlet bei der Qualifikatioun fir d’Finall war den Italiener Zane Weir mat 21,46 Meter virum Kroat Filip Mihaljeviv mat 21,20 Meter an dem Italiener Leonardo Fabbri mat 21,17 Meter.
Nom Forfait vum Charel Grethen war de Bob Bertemes den Donneschdeg den Owend den eenzegen FLA-Athlet, deen zu Istanbul am Asaz war. De Bielesser hat als eenzege vun deenen 18 Konkurrenten, déi den Donneschdeg den Owend am Bommstoussen ageschriwwe waren, e bloen Dossard. Dat well hien aktuell d’Nummer 1 an Europa ass. Um nationale Championnat hat den Athlet vum CA Bieles 21,93 Meter gestouss an hat säin nationalen Indoor-Rekord ëm 90 Zentimeter verbessert. Sou wäit huet dëst Joer nach keen Europäer gestouss. De Bob Bertemes bleift awer mat de Féiss um Buedem.
De Bern Thill huet hien den Donneschdeg de Moien dozou befrot.
D’Finall gëtt e Freideg den Owend zu Istanbul organiséiert.
