E Samschdeg den Owend war den Ofschloss vun der Luxembourg Urban Garden Expo an der Stad an zu Ettelbréck.

162 Deeg laang konnt een an der Stad an zu Ettelbréck déi verschiddensten urban Gäert, Landschafts- a Konschtinstallatioune bewonneren. Fir den Ofschloss vun der LUGA ze feieren, goufen et e Samschdeg an der Stad verschidden Aktivitéiten, Concerten a Workshops, déi de Projet nach eng leschte Kéier opliewe gelooss hunn. Verbindung tëscht Natur, Stad a Mënsch stäerken an d’Bewosstsi fir nohalteg Stadentwécklung, Biodiversitéit a Liewensqualitéit fërderen. Dat war d‘Zil vun der LUGA, déi der Generalcoordinatrice Ann Muller no och erreecht gi wier. De Succès ze miessen, wier net schwéier gewiescht:
"Et war e Succès, et ware vill Leit hei, d'Feedbacken waren extreem gutt. Mir moossen net mat Zuelen, well wéi wëllt Der am ëffentleche Raum zielen, wéi vill Leit komm sidd? Mir hunn natierlech Indicateuren, wou mer wäerten elo, wa mer de Bilan maachen, déi mat erarechnen."

Vum Panoramalift am Pafendall aus haten d‘Visiteuren eng wonnerbar Vue op d‘Festivitéite vun der LUGA. Déi Leit, déi sech erof getraut hunn, konnte vun der Musek, Iessen & Gedrénks an de sëllegen Aktivitéiten, déi ugebuede goufen, profitéieren.

E Samschdeg de Mëtteg ass et dann an der Nordstad mam Ofschloss vun der LUGA weidergaangen. D‘Ettelbrécker Musek ass zesumme mat engem Bauerecortège, deen aus Trakteren an Aarbechtsmaschinne bestanen huet, Richtung Däichhale gaangen, wou et mat de Festivitéite weidergaangen ass. Zu Ettelbréck haten d‘Organisateuren den Optrag, d‘Landwirtschaft an d‘Liewensmëttelproduktioun hei am Land erëmzespigelen.

"Mer hu verschidde Projeten, déi mer hale kënnen, wou mer och ganz frou driwwer sinn. Dat war ganz flott, eng Zesummenaarbecht mat der Ettelbrécker Gemeng och, wou mer direkt vu vir era gekuckt hunn, fir déi och esou opzestellen, datt se kënnen deemno wéi gehale ginn, wat dann och elo de Fall ass. Bon, d'Schaupplanzungen, dat sinn zu engem groussen Deel eejäreg Planzen. Dat heescht, déi bleiwen elo weider net stoen. Dat gëtt nei ugeséint da fir d'nächst Joer fir d'Foire agricole dann nees do ze maachen", erkläert d'Danielle Georgen, Chargée de Projet vum LUGA Nordstad.

22 Milliounen Euro huet déi urban Gaardenausstellung an der Stad an zu Ettelbréck kascht. No der LUGA gëtt awer näischt einfach ewech geheit: Planzen a Materialie ginn ëmgesat, d’Installatioune ginn deelweis weider integréiert, an d’Iddi vun der „grénger Stad“ soll a klenge, konkreten Nohaltegkeetsprojete viruliewen.