An d'A gestach huet dem Marco Godinho seng Odyssee "Written by Water" am Lëtzebuerger Pavillon op der Konschtbiennale am Arsenal zu Venedeg.

Zanter der offizieller Erëffnung, den 9. Mee 2019, huet de Lëtzebuerger Pavillon op der 58. internationaler Konschtausstellung zu Venedeg grousse Succès bei de Visiteure gehat.

An der Hallschecht vun der Biennale, déi hir Dieren de 24. November wäert zoumaachen, ass d'Ausstellung "Written by Water" vum Kënschtler Marco Godinho scho vu méi wéi 43.000 Persoune besicht ginn. Déi nei Lag vum Pavillon huet och zu der héijer Unzuel u Visiteure bäigedroen, well de Grand-Duché op der Haaptausstellungsplaz vun der Biennale vertrueden ass, direkt am Zentrum nieft dem Giardini-Park.

Schonn am August ass iwwert d'Konschtbiennale zu Venedeg bericht ginn

Déi 58. Konschtbiennale vu Venedeg hat hir Dieren ënnert dem Motto "May you live in interesting times"fir de Fachpublikum opgemaach. Mat dësem Sproch, vun deem behaapt gëtt, e kéim aus dem Chineseschen, wëll de Kurator Ralph Rugoff d'Roll vun der Konscht weisen: Si ka keng politesch Stréimungen ophalen oder d'Schicksal vu Mënschen op der Flucht verbesseren, mä si kéint awer Weeër weisen, wéi een an esou intressanten Zäite liewen an denke kann.

VIDEO: Biennale Venedeg
Déi 58. Konschtbiennale vu Venedeg huet hir Diere fir de Fachpublikum opgemaach a steet ënnert dem Motto "May you live in interesting times"

© Pedro Venancio

"Written by water" heescht an deem Kader d'Wierk vum portugisesch-lëtzebuergesche Kënschtler Marco Godinho. Hie befaasst sech a sengem Wierk mat der Relatioun tëscht Mënsch a Mier. Amplaz dem Mënsch seng Geschicht ze lauschteren, léisst hien d'Mier erzielen. Dofir huet hien an de leschte Joren 3000 Notizhefter Säit fir Säit an d'Mëttelmier gezappt. Déi 3000 Hefter sinn op enger riseger Plattform niefteneen ubruecht. Donieft kann een e Video gesinn, op deem dem Kënschtler säi Brudder, den Acteur Fabio Godinho, Säit fir Säit aus dem Homer senger Odyssee liest an d'Blieder dem Mier gëtt.

Eng vun den Aventuren ass déi, wou dem Odysseus seng Männer op enger Plaz eng Frucht z'iesse kruten, duerch déi se alles vergiessen, och déi Geschicht gräift de Marco Godinho op: an engem gliesene Krou ass d'Jujuba-Fruucht, déi a portugiseschem a lëtzebuergeschem Brantwäin ugemaach ass. An eréischt am November fir de Finissage gëtt dat och opgemaach a geschmaacht.

Déi ganz poetesch Vue vum Lëtzebuerger Pavillon huet awer och eng geopolitesch. Et gëtt ëm de Wee vum Mënsch bei d'Mier, vum Norden an de Süden. Et ass eng Odysee a si steet symbolesch fir de Flux vun de Migratiounen am Mëttelmier aus de leschte Joren.

AUDIO: 10/05/2019 De Marco Godinho iwwer säi WIerk

No der Architektur-Biennale vum leschte Joer ass et fir d'zweet, datt Lëtzebuerg op enger neier Plaz, matten am Arsenale mat sengem Pavillon present ass. Déi méi grouss Locatioun bréngt de Kënschtler méi Fläch an och méi Visibilitéit.

AUDIO: 10/05/2019 Sam Tanson iwwer de Lëtzebuerger Pavillon am Arsenale

De Vernissage vun "Written by water" a Präsenz vun der Kulturministesch Sam Tanson. De Marco Godinho gouf vun engem Jury ausgewielt, d'Ausstellung ass vum Casino-Forum d'Art Contemporain curatéiert.

VIDEO: "Written by water"
Dem Marco Godinho säi Wierk kritt vill Opmierksamkeet bei der Konschtbiennale am Arsenale zu Venedeg.

D'Reaktiounen op de Lëtzebuerger Pavillon si ganz positiv, de renomméierten "Quotidien de l'art" zielt dem Marco Godinho zu hire Favoritten op den Haaptpräis de "gëllene Léiw".

Vum 11. Mee bis den 24. November ass d'Biennale fir de Publikum op.

D'ArtBox vum 1. Juni 2019

De portugisesch-lëtzebuergesche Kënschtler Marco Godinho bei der ArtBox am Portrait
All Woch si mir mat engem Kënschtler ënnerwee an kréien en Abléck an säin Alldag.

Kultur Summer Push-Up

An der Serie Kultur Summer Push-Up kuckt d'Kulturredaktioun op déi interessantste Momenter aus de leschte Wochen zeréck a gräift Sujeten nach eemol op.