Dem Kafka säin “Ein Bericht für eine Akademie” ass jo schonn 1917 erauskomm. Dem Édouard Louis säi „Qui a tué mon père“ eng 101 Joer méi spéit. An dach huet den Däitsche Regisseur Stefan Maurer e puer Parallellen entdeckt, déi sech wärend dem Schreifprozess nach weider verdéift hunn.
D’Resultat ass en Theaterstéck an zwou Sproochen, mam Luc Schiltz a Germain Wagner an den Erzielerrollen. Behandelt ginn eng Rëtsch Themen, ënner anerem toxesch Männlechkeet, verschidde Visioune vun engem stereotypesche Mann a wat geschitt wann een deem typesche Bild net entsprécht. Donieft gëtt och d’Relatioun tëschent finanzielle Méiglechkeeten a Muecht diskutéiert.
„Ein Bericht für eine Akademie / Qui a tué mon père“ kann een den 9. an 11. November an den Escher Theater kucke goen. E Mëttwoch ass dann och nach eng Schoulvirstellung.
