Ugefaang huet dem Steven Cruz seng kënschtleresch Rees mat der Fotografie. Ma nieft der Fotografie huet hie sech awer och an der Keramik-Konscht ëmmer méi etabléiert. Seng aktuell Aarbecht “Marés Vivas” ass bis elo säin drëtt a gréisst Keramik-Wierk.
2024 krut de Kënschtler mat portugiseschen Originne vun de Rotonden den Optrag, de Pilier ze verkleeden, dee fréier déi al Bréck tëscht der Gare a Bouneweg gestäipt huet. Dofir ass hien an d’Geschicht vun der Immigratioun vun de Portugisen an den 1960er Joren agedaucht.
Ëm déi 1.800 Plättercher dekoréieren elo de 5 Meter héije Pilier vun enger Bréck, déi béid Natioune vereent a getrennt huet. “Marés Vivas” bedeit iwwersat “Lieweg Mierer”
De 4. Dezember war de grousse Vernissage vu “Marés Vivas” bei de Rotonden.
