D’Sängerin Fanny Biascamano, déi 1991 duerch hir Coverversioun vum berüümte Lidd “L’homme à la moto” vum Edith Piaf bekannt gi war, ass e Samschdeg de 27. Dezember am Alter vu 46 Joer gestuerwen. Hir Famill huet déi traureg Nouvelle e Sonndeg bekannt ginn an erkläert, datt d’Sängerin no laanger Krankheet gestuerwe wier.
Ganz simpel ënner hirem Virnumm Fanny bekannt huet d’Musekerin zu de Kannerstare gehéiert, déi an den 90er duerch hir Participatioun bei “Numéro 1 de demain” an der Emissioun “Sacrée Soirée” vum Jean-Pierre Foucault immens beléift waren. Mat nëmmen 12 Joer huet si d’Lidd “L’homme à la moto” gesongen - en éischte Succès fir eng Single, déi sech iwwer dräi Millioune Mol verkaf hat.
Dono huet si hir éischt Single verëffentlecht, déi immens erfollegräich war an a Frankräich a Kanada mat engem duebele gëllenen Disque ausgezeechent gouf. Dee Succès huet och dozou gefouert, datt si Frankräich am mee 1997 beim Eurovision Song Contest vertrueden huet. Mat “Sentiments songes”, engem vum Jean-Paul Dréaus geschriwwenen a komponéierte Lidd, huet si déi siwent Plaz erreecht.
Nodeems si sech Ufank den 2000er fir hire Studium zréckgezunn hat a schonn e bësse vergiess gi war, war si 2010 mat der Publikatioun vun hirem Buch “Enfants stars, plus dure sera chute” zréck an d’Ëffentlechkeet komm.
Eng lescht Éier kritt d’Fanny Biascamano bei enger reliéiser Zeremonie e Samschdeg den 3. Januar an der Kierch Saint-Joseph zu Sète, wou si gebuer war.
