D’Lola Valerius wollt eigentlech Architektin ginn. Ganz séier huet et awer wärend sengem Studium gemierkt, datt dat net dat Richtegt fir et wier an huet dunn e komplett anere Wee ageschloen: dee vun der Patisserie oder fir méi präzis ze sinn, dee vum Maître Chocolatier. No enger 6-Méint laanger Ausbildung zu Paräis an enger Erfarung an enger renomméierter Patisserie am Taiwan ass d’Lola zréck zu Lëtzebuerg a wëll elo en eegene Business mat eegenem Produit lancéieren: faarweg Knippercher.
Fir d’Fanny Bervard war de Wee bei d’Moud eigentlech ëmmer kloer. Ma deen an d’Selbstännegkeet net onbedéngt. Vrun e wéineg méi ewéi engem Joer huet et awer du säin eegene Bijou-Label gegrënnt: “Romantico Romantico”. Wat ugefaangen huet mat enger Iddi, fir en eegent puer Ouerréng ze maachen, ass elo en eegene Business.
Déi zwou Lëtzebuergerinne stinn also fir Innovatioun a Kreativitéit.
Zwee Stéchwierder, op déi d’Lëtzebuerger Regierung an de leschte Joren ëmmer nees insistéiert huet, wann et ëm Nation Branding gaangen ass. Lëtzebuerg als Start up Natioun. E Grand-Duché, deen de Wee vun der Selbststännegkeet encouragéiert. Eng Taktik, déi opgeet, ëmmerhi si laut Eurostat ronn 10% vun de Lëtzebuerger Independanten, domat leie mer iwwert dem EU-Duerchschnëtt. Ma et ass keen einfache Wee - scho viru Corona-Zäiten net an elo sécher net méi.
