Den 13 Joer jonke Lëtzebuerger Aridane Rodrigues Teixeira huet un den éischte sougenannte "Blind-Auditions" vun der 12. Staffel vun der franséischer Versioun vun "The Voice Kids" op TF1 deelgeholl. D'Sendung gouf e Samschdeg, den 22. August, diffuséiert.
Fir seng Performance huet de jonke Sänger vun Esch d'Lidd "Set Fire to the Rain" vun der Sängerin Adele gewielt. Wärend senger Interpretatioun huet de Jury-Member a franséische Rapper Soprano de Buzzer gedréckt. Den Aridane Rodrigues ass domat eng Ronn weider an am Team vum Soprano fir déi nächst Phase vun der Emissioun. Op der Bün dierft hien eréischt an e puer Woche stoen, well elo nach weider Blind Auditions sinn. Egal wéi ass de Lëtzebuerger awer an der nächster Ronn.
D'Performance op der franséischer Tëlee war net déi éischt Erfarung bei The Voice Kids vum jonke Sänger. Den Aridane, dee portugisesch Wuerzelen huet, war schonn zejoert Kandidat bei "The Voice Kids" Portugal.
An der 6. Staffel vun der portugisescher Editioun konnt hie sech och an de Blind Auditions duerchsetzen an huet d'Etapp vun de sougenannte "Battles" erreecht.
