Den Ëmzuch aus den USA an d'Vereenegt Kinnekräich soll "bis Enn des Mounts" geschitt sinn, wéi e puer brittesch Medien um spéide Mëttwochowend gemellt hunn. Déi zwee Kanner vun der Koppel wiere scho fir den Ufank vum Schouljoer am September an enger brittescher Schoul ageschriwwen.
De jéngste Bouf vum Kinnek Charles III. a seng Famill wéilten "d'Vereenegt Staate bis Enn des Mounts verloossen, fir sech an engem private Wunnsëtz néierzeloossen, deen net zum Kinnekshaus gehéiert", schreift den "Telegraph". De Wunnsëtz soll ausserhalb vu London sinn. Den 41 Joer ale Prënz a seng Fra hunn zwee Kanner, de Prënz Archie (7 Joer al) an d'Prinzessin Lilibet (5 Joer al). D'Famill lieft aktuell am US-Bundesstaat Kalifornien, an deem d'Meghan Markle opgewuess ass.
De Retour a Groussbritannien kënnt iwwerraschend. Der Noriichtenagence Press Association no gouf och de Kinnek Charles III. eréischt e Sonndeg vun de Pläng vu sengem Bouf gewuer. De 77 Joer ale Monarch "begréisst d'Geleeënheet, méi Zäit mat der Famill am private Kader ze verbréngen", heescht et an engem Bericht. Um Status vum Harry an dem Meghan géing sech awer näischt änneren: D'Koppel wäerte weiderhi keng offiziell kinneklech Aufgaben iwwerhuelen.
Onkloer ass bis well, ob dem Harry säi méi ale Brudder William an deem seng Fra Catherine iwwer d'Nouvellen informéiert goufen. Den Trounfollger an den Harry hu sech ausernee gelieft a solle guer net méi matenee schwätzen.
Den Harry a seng Fra hate sech Ufank 2020 am Kader vum Sträit mat der kinneklecher Famill vun hire Flichten zréckgezunn. Fir d'éischt ware si a Kanada geplënnert, kuerz drop dann a Kalifornien. Den Harry reprochéiert dem Palais ënnert anerem, datt d'Meghan rassistesch beleidegt gi wier. D'Relatioun zum Kinnekshaus gëllt zanterhier als immens ugespaant.
Zejoert hat den Harry awer erkläert, datt hie sech mat sengem Papp, dee Kriibs huet, nees verdroe wéilt. De leschte Mount waren den Harry a seng Famill déi éischte Kéier zanter véier Joer beim Kinnek Charles III. op Besuch. Getraff hate si sech zu Highgrove, der Privatresidenz vum Kinnek am Südweste vun England. Och d'Kinnigin Camilla war dobäi.
Trotzdeem wier de Retour vum Prënz Harry eng "onerwaart Entwécklung". De Royal-Expert Richard Fitzwilliams sot um Sender GB News, datt hie mengt, datt d'Koppel "et an den USA net gepackt" hätt. Si wieren "doru gescheitert, zu Hollywood zu der absolutter Spëtzt ze gehéieren".
D'Koppel hat, nodeems si Groussbritannien verlooss hat, en Deal mat Netflix ënnerschriwwen - Berichter no am Ëmfang vun 100 Milliounen Dollar. Vill vun hire Projete wieren awer beim Public net esou ukomm wéi erhofft. E Kontrakt mat Netflix, deen 2025 gemaach gouf, soll däitlech méi schlecht Konditiounen hunn.
