Wann am Radio Musek leeft, mussen Droits d’auteur bezuelt ginn – dat ass bekannt. Mee déi Reegel gëllt och fir Bistroen, Coiffeurssalonen, Diskothéiken, Baler oder aner Evenementer, wou Musek ëffentlech gespillt gëtt. Dozou erkläert de Maître Jean‑Jacques Schonkert, datt d’SACEM dofir zoustänneg ass, d’Rechter vun Auteuren a Komponisten anzegoen.
Wien d’Musek net deklaréiert, kritt an der Reegel e Rappel. Bei bewosste Verstéiss, wéi zum Beispill enger onerlaabter Notzung oder engem Cover ouni Autorisatioun, riskéiert een awer héich Geldstrofen – an am Extremfall souguer Prisongsstrof.
Och Bicher a Fotokopien ënnerleien de Copyright‑Reegelen. Hei këmmert sech d’Organisatioun LUXORR ëm d’Rechter, besonnesch vu lëtzebuergeschen Auteuren.
Eng aktuell Erausfuerderung bleift d’Fro, wéi kënschtlech Intelligenz an Zukunft am Droit d’auteur ze bewäerten ass. Eng juristesch Debatt, déi nach laang net ofgeschloss ass.
