D'Summervakanz 2020, och hei zu Lëtzebuerg, gëtt dëst Joer anescht wéi gewinnt. Eis Experten hunn op Är Froe geäntwert.

Déi grouss Vakanz steet virun der Dier, ma Vakanzestëmmung wëll bei villen net esou richteg opkommen. Wouhi kann ee fueren, wéini huet een d'Recht, d'Reess ze annulléieren oder ëmzebuchen a wat geschitt, wann ech an der Vakanz an e Lockdown am Ausland geroden? Eis Radio-Nolauschterer hunn en Dënschdeg am Kader vum Vakanzendag vill Froen un d'Experten erageschéckt.
Vakanz am Ausland, wäit ewech vun doheem – den Ament zécke vill Leit, fir dat ze maachen. Iwwerdeems eng Rei Operateure wéi och d'Luxair duerch d'sanitär Situatioun méi flexibel sinn, wat Ëmbuchungen ugeet, esou bleiwen d'Reegele vun der Assurance-Annulatioun awer strikt. Dës gëllt just, wann een aus gesondheetleche Grënn net reese kann. Déi gezwonge Quarantän géif hei drënner falen. Bei enger sougenannter "Auto-Quarantän" oder am Fall vu Reeswarnunge spillt d'Versécherung net.

Eng Dosen Experten aus dem Reesberäich, dem Konsumenteschutz, aus dem Ausseministère an der Santé ware beméit, déi vill Ufroe live um Radio, awer och per Mail oder iwwer Telefon ze beäntwerten. Wéi dës: Wat geschitt , wa lo wéi rezent a Spuenien, Regiounen an de Lockdown kommen a mir sinn do an der Vakanz?

Am Prinzip wier dat méiglech, seet den Henri Schumacher vum Ausseministère. Et sief dann, d'Mesuren op der Plaz wieren esou strikt, datt iwwerhaapt keng Mobilitéit méi méiglech wier.

Dovunner ofgesinn hu Residentë vum Grand-Duché zu all Moment d'Recht, zréck an d'Land ze kommen. Onofhängeg, vu wou se hierkommen a vun den Infektiounszuelen op der Plaz. Et géif an deem Fall och net vu vir eran eng obligatoresch Quarantän.

Op der Vakanzendestinatioun selwer sollt ee sech am beschten un déi sanitär Recommandatioune vu Lëtzebuerg halen, wéi Sécherheetsdistanz a Mask a besonnesch och op Party verzichten. Souguer wann d'Reegelen op der Plaz selwer méi large wieren an d'Infektiounszuele relativ niddreg, réit den Direkter vun der Santé. De Jean-Claude Schmit ënnersträicht, datt d'Zuel vun Tester staark vu Land zu Land variéiere géif, deemno géifen niddreg Infektiounszuelen net zwangsleefeg déi reell Situatioun zréckspigelen.

Wiem d'Reesen an dësen Zäiten net geheier ass, ka Lëtzebuerg och als Tourist entdecken. 100 things to do.lu, esou heescht eng Websäit, déi visitluxembourg fir dëse spezielle Summer lancéiert huet.