Historeschen Dräier-Sommet a ChinaTrump, Xi a Putin treffen sech zu Shenzhen

AFP, iwwersat vun RTL
Am Kader vum APEC-Sommet a China sollen den Donneschdeg d'Presidente vun den USA, China a Russland fir eng historesch Dräier-Reunioun zesummekommen. Am Mëttelpunkt stinn déi international Sécherheet, den Handelskonflikt tëscht Washington a Peking an de Krich an der Ukrain.
TOPSHOT - China's President Xi Jinping speaks during the Asia-Pacific Economic Cooperation (APEC) CEO Summit in Shenzhen, in China's southern Guangdong Province, on November 18, 2026. (Photo by Ng Han Guan / POOL / AFP)
© POOL/AFP

De chineesesche President Xi Jinping huet e Mëttwoch zu Shenzhen den APEC-Sommet opgemaach an dobäi fir méi international Zesummenaarbecht plädéiert. Besonnesch an de Beräicher kënschtlech Intelligenz, digital Wirtschaft a fräien Handel misst méi enk zesummegeschafft ginn.

De Xi huet och gefuerdert, Handels- an Investitiounsbarrièren ofzebauen. China wéilt auslänneschen Entreprisen e méi stabilt a viraussiichtlecht wirtschaftlecht Ëmfeld bidden an den Zougang zu verschiddene Secteuren erliichteren.

Putin a Xi am Gespréich virum Dräier-Sommet

De russesche President Wladimir Putin ass e Mëttwoch mam Xi Jinping zesummekomm. Et war schonn hir fënneft Reunioun dëst Joer.

De Putin huet sech optimistesch gewisen, wat déi geplangte Gespréicher mam US-President Donald Trump an dem Xi Jinping ugeet. Hien erwaart sech dovun nëtzlech Resultater a betount, datt an enger Zäit vu geopolitesche Spannungen den Dialog méi wichteg wier wéi Konfrontatioun.

De Sommet suergt allerdéngs och fir Suergen an Europa. Et gëtt gefaart, datt déi dräi Staatscheffen iwwer d'Zukunft vun der Ukrain schwätze kéinten, ouni datt Kiew oder déi europäesch Partner direkt mat um Dësch sëtzen.

Nieft der Ukrain kéinten och de Krich am Iran, d'nuklear Ofrëschtung an déi strategesch Relatiounen tëscht de Groussmuechten thematiséiert ginn.

Handelssträit an AI-Chips belaaschten d'Relatiounen

D'Relatiounen tëscht den USA a China bleiwen ugespaant. Washington huet dës Woch nei Restriktioune fir den Export vu modernen Halbleiter annoncéiert, déi ënner anerem fir d'Entwécklung vu kënschtlecher Intelligenz gebraucht ginn.

D'US-Regierung wëll domat verhënneren, datt China iwwer Drëttlänner Zougang zu héich performanten AI-Chips kritt. Besonnesch Liwwerungen a Länner wéi Singapur, Malaysia, Thailand an Indonesien ginn doduerch méi streng kontrolléiert.

Gläichzäiteg bleift den Handelskonflikt mat géigesäitegen Douanestariffer an Exportbeschränkungen e wichtege Sträitpunkt. Eng provisoresch Eenegung tëscht Trump a Xi, déi d'lescht Joer erreecht gouf, leeft am Januar aus.

Trump no Besuch op de Philippinnen ënnerwee a China

Den Donald Trump war e Mëttwoch nach op de Philippinnen, wou hie mam President Ferdinand Marcos an anere Staats- a Regierungscheffen aus der Regioun zesummekomm ass.

Dobäi huet hien eng méi enk militäresch Zesummenaarbecht mat Manila an Aussiicht gestallt. Och eng méiglech Ënnerstëtzung vun den USA beim Opbau vun der Atomenergie op de Philippinne war en Thema.

Säi Besuch gouf vu Protester begleet. Demonstranten hunn ënner anerem géint d'US-Handelspolitik an den amerikaneschen Afloss an der Regioun protestéiert.

Den Trump huet ausserdeem méiglech bilateral Gespréicher mam Putin an dem nordkoreanesche Staatschef Kim Jong Un an Aussiicht gestallt. Eng Reunioun mam Kim war bis e Mëttwoch awer nach net confirméiert.

Japan verfollegt d'Entwécklungen opmierksam

Och déi japanesch Premierministesch Sanae Takaichi ass e Mëttwoch a China ukomm. D'Relatiounen tëscht Tokio a Peking si wéinst hiren Aussoen iwwer Taiwan staark ugespaant.

Japan verfollegt virun allem déi diplomatesch Kontakter tëscht den USA, China a Russland mat grousser Opmierksamkeet. Tokio betount dobäi d'Wichtegkeet vun der Allianz mat Washington fir d'Stabilitéit am indo-pazifesche Raum.

De geplangten Dräier-Sommet tëscht Trump, Xi a Putin en Donneschdeg gëllt domat als ee vun de wichtegsten diplomateschen Evenementer vum Joer. Ob d'Gespréicher konkret Resultater bréngen, bleift ofzewaarden.

Back to Top
CIM LOGO