Fir dëst Joer rechent de Statec mat enger Croissance, ma nächst Joer géif et nawell zolidd méi lues goen, sou d'Previsioun vum Statistik-Institut.

Weltwäit läit de Wirtschaftswuesstem bei ronn 3 Prozent, an domat esou déif wéi zanter der Finanzkris 2008 net méi, esou Statec a senger Note de conjoncture déi en Dënschdeg presentéiert gouf. Grënn dofir géifen et der eng sëllechen. Ënnert anerem Schold un deem Réckgang vun der Croissance wieren déi international Handelskonflikter, d'Onsécherheete wéinst dem Brexit, de strukturelle Wandel vun der Autosindustrie, genee wéi déi chinesesch a nordamerikanesch Ekonomien, déi méi lues dréinen, erkläert de Serge Allegrezza, Direkter vum Statec.

"Wa si sech net eens ginn, wësse mer och, dass héchstwarscheinlech d'Bourssen erëm eng Kéier wäerte falen. Dat huet en negativen Impakt net nëmmen op d'Weltkonjunktur, mä och hei zu Lëtzebuerg. A säit de Moie wësse mer och nach, dass nei Sanktiounen annoncéiert gi sinn, géint verschidde Länner vun der Europäescher Unioun, nieft deenen, déi schonn am Raum stinn. An all dat dréit zur Incertitude bäi."

AUDIO: Statec / Rep. Maxime Gillen (3.12.19)

Sollt et an den USA effektiv zu enger Rezessioun kommen, hätt dat Konsequenzen op all déi aner Staaten, a virop op déi méi kleng Länner. An deem Fall kéint d'Previsioun fir Lëtzebuerg vu 2,4 Prozent Wuesstem am Joer 2020 ëm bis zu engem Prozent mussen no ënne revidéiert ginn, erkläert den Direkter vum Statec, Serge Allegrezza.

„Ganz vill vun deene Problemer, déi mir elo hunn, si fabrizéiert duerch politesch Decisioune vun enger Weltmuecht, déi do awer eng ganz aner Strategie fiert, nämlech eng Strategie just fir dat Land an net allgemeng Wuelstand fërdere fir déi ganz Gemeinschaft op der Welt."

Fir 2019 rechent de Statec nach mat enger Croissance vu bal dräi Prozent. Allgemeng géif d'Zuel vun neien Aarbechtsplazen erëm liicht erofgoen. Vun 3,7 Prozent méi Emploi dëst Joer op 3,2 Prozent fir 2020. De Chômage géif iwwerdeems bei ronn 5,3 Prozent vun der aktiver Populatioun bleiwen. Wat d'Kafkraaft vun de Stéit ugeet, géif déi e gutt Stéck erof goen, esou de Ferdy Adam vum Statec.

"Haten d'Leit 2017 an 2018 pro Joer nach 4,3 respektiv 2,4 Prozent méi am Portmonni, sinn et der dëst an d'nächst Joer nëmmen nach eppes méi wéi ee Prozent méi um Enn vum Mount."

Ënnert anerem, well en Deel vun der Steiererklärung fir Betriber digitaliséiert gouf, an domat méi séier kann ofgerechent ginn, waren d'Recettë vum Staat dëst Joer ongewéinlech héich. Allerdéngs en eemolegen Effekt, deen déi nächst Joren net ka bäibehale ginn. Trotzdeem géing et nach Handlungsspillraum fir Investissementer an eng Steierreform ginn, mä d'Politik misst Choixen treffen.

D'Previsioune fir de Wirtschaftswuesstem a fir d'Recettë goufe besonnesch 2016 staark no uewen revidéiert. Aktuell wier d'Previsibilitéit awer besser wéi an der Vergaangenheet, sou den Direkter vum Statec. De Serge Alegrezza seet awer och, d’Zuele wieren awer nach méi zouverléisseg, wann de Statec méi Donnéeë géing kréien. Haaptsächlech vun der Steierverwaltung.