100 Aarbechtsplazen, déi doduercher zu Colmer-Bierg betraff sinn, sollen op aner Sitten am Land affektéiert ginn.

100 Aarbechtsplaze solle bei der Goodyear vum Colmar-Bierg reaffektéiert ginn, sief dat an aner Servicer, respektiv op de neie Site zu Diddeleng. D'Gewerkschafte LCGB an OGBL bedaueren dëse Choix. Grond ass d'Re-Lokalisatioun vun der Produktioun an d'Ausland.

Aarbechtplaze bei Goodyear reaffektéiert / Tim Morizet

De Pneue-Produzent Goodyear huet wëlles hier Produktioun vu Kleng-Series-Autospneue vu Colmar-Bierg op aner Wierker an Europa ewech ze verlageren. Et wier néideg, d'Produktiounsunitéit vun de sougenannten „Pneus à faible volume“ op aner europäesch Sitten ze transferéieren, dës Platzen hätte besser Capacitéiten a Ressourcen. Ma och de Site zu Diddeleng kéint hei weider Opträg kréien, wéi den Alexander Verstappen vu Goodyear erkläert.

Et ass eng Mesure déi eiser Entreprise erlaabt d'Produktiounskäschte wesentlech erofzesetzen an d'Rentabilitéit vum Portfolio ze garantéieren. Et gëtt eis och d'Méiglechkeet an eisem extreemst schwieregem Ëmfeld kompetitiv ze bleiwen.“

D'Gespréicher tëscht der Direktioun vun der Goodyear an de Gewerkschafte sollen elo ufänken. D'Zill op béide Säiten ass et, déi 100 concernéiert Mataarbechter weider ze beschäftegen, dat an anere Servicer, respektiv op anere Sitten. An an déi Richtung wäerten och d'Gespréicher verlafen, verséchert den Alexander Verstappen.

Vu Säite vun de Gewerkschafte war een e bëssen iwwerrascht iwwert Decisioun vum Pneu-Gigant. Beim LCGB géif een d'Evolutioun awer verstoen, seet de Robert Fornieri. Grad um Site zu Lëtzebuerg wier een net op d'Pneue vu klengen Autoe spezialiséiert, mä op méi grouss Pneuen. Déi grouss Produktioun vun ënner anerem Camionspneuen an d'Entwécklung ewéi och d'Teste vum Material soll weider zu Lëtzebuerg bleiwen.

Déi aner Pneue géifen op anere Sitten an Europa produzéiert ginn, déi och dofir ausgeluecht sinn. Do kéint een déi méi kleng Pneuen méi effikass an eng méi engem grousse Volume produzéiert, esou datt et sech och fir den Hiersteller géif lounen.

De Robert Fornieri vum LCGB

D'Goodyear huet d'lescht Joer nach eng nei Produktioun zu Diddeleng opgemaach. Den Ament beschäftegt de Pneu-Gigant eng 3.400 Mataarbechter zu Lëtzebuerg.