Den Ament wéi d’Feier lassgaangen ass, waren de Lëtzebuerger Nationaltrainer am Karaté Raul Cuevra a seng Partnerin Elena Quirici zesumme mat véier Athleten am Hotel ënnerbruecht. De Raul Cuevra sech um 23.20 Auer e Freidegowend per Telefon beim President vun der Karatefederatioun, dem Fred Charlé gemellt, ewéi dësen am interview mat RTL erkläert: “Um 23.20 Auer huet den Nationaltrainer mir ugeruff. Hien huet mir gesot, dass den Hotel brenne géif. Wéi ech beim Hotel ukomm sinn, stoungen d’Leit dobaussen. Si hate guer näischt méi. Weder Schong nach hir Pabeieren oder de Laptop. Alles huet missen am Hotel bleiwen. Et war scho bal eng Minutt op 12. Si hunn d’Kummerdier opgemaach an du koum den Damp schonn eran.”
De Karate-Nationaltrainer ass e Spuenier, deen an der Schwäiz zu Zürech zesumme mat senger Partnerin, dem Elena Quirici lieft. Fir d’Lescht war de Raul Cuerva Trainer vun der schweedescher Nationalekipp. Fir e puer Deeg kënnt de Spuenier dann all Kéiers op Lëtzebuerg, fir den Training ofzehalen. Meeschtens vu freides bis sonndes. “Mir ware scho bei der Police. Schliisslech hu si hir Päss verluer a musse muer zréckfueren. Vun der Police brauchen si elo e Pabeier, deen zertifiéiert, dass si hir Dokumenter an engem Feier verluer hunn.”, esou de Fred Charlé.
“Et war e ganz entspaanten Training”, sou den Head Coach Raul Cuerva um RTL-Mikro “Den Owend huet allerdéngs mat engem Feier am Hotel net esou flott opgehalen. Mäi Papp ass Pompjee, dofir weess ech, wéi ech mech muss an esou enger Situatioun verhalen.”
Déi ganz Ekipp vun der Karate Federatioun ass bis e Sonndeg an engem Hotel zu Péiteng elo ënnerbruecht.
Eng direkt Nopesch vum Hotel-Restaurant an der Rue des Alliés ass wärend der Nuecht vun de Pompjeescamione wakereg ginn. “Je suis sorti de la maison et j’ai vu les flammes”, erzielt d’Emilie am RTL-Interview. Dem Proprietär wär et gelongen, all d’Gäscht aus dem Hotel ze kréien. Bis op eng Persoun, déi huet misse gehollef kréien, fir aus dem Zëmmer ze kommen.
“Honnêtement ça serait vraiment triste que ça soit la fin d’une histoire”, sou d’Nopesch nach weider am Interview.
