Och als Deputéiert wësse mir net méi iwwer d'Drone wéi jidder aneren dobaussen. Et ass e Problem, datt d'Regierung net méi transparent mat den Drone-Virfäll ëmgeet. Dat léisst vill Raum fir Spekulatiounen an Onsécherheet, dat sot de Marc Baum en Dënschdeg de Moien als eisen Invité vun der Redaktioun.
Den Deputéierte vun déi Lénk wäert Mëtt Oktober wéinst dem Rotatiounsprinzip a senger Partei, säi Mandat um Krautmaart ofginn, an de Gary Diederich iwwerhëlt. Dat selwecht gëllt fir den David Wagner, dee vum Ana Coreia da Veiga ersat gëtt.
D'Regierung géif op alle Fall an dëser Drone-Fro alt nees net den Androck maachen, wéi wa se Här a Meeschter vun der Situatioun wär. D'Aufgab vun der Regierung wär et ze rassuréieren. Dat géif se awer net fäerdeg bréngen an dat wär net fir d'éischt. Och d'Chamber wier bis ewell net informéiert iwwer dat, wat d'Regierung weess oder net weess, bedauert de Marc Baum. Bei de Bränn am Héije Venn oder wéi de Postreseau gehackt gouf, wär d'Kommunikatioun "eng eenzeg Katastroph" gewiescht.
De Sträit am Gesondheetswiesen an tëscht der AMMD an der CNS, respektiv der Gesondheetsministesch Martine Deprez war en Dënschdeg de Moien och en Theema. Déi Lénk ënnerstëtze ganz kloer den aktuelle System. Et kéint een net wéi d'Doktere mat maximal Fuerderungen optrieden an d'Ënnerschrëft vun der Konventioun un all méiglech Fuerderunge knäppen. D'Doktere wéilte gären hir eege Präisser definéieren. Dat wär den Doud vun eisem ëffentleche Gesondheetssystem, mengt de lénken Deputéierten. Keng vun de siwe Parteien an der Chamber géif dat ënnerstëtzen.
Et wiere jo Texter um Dësch, fir kleng Interventiounen an de Cabineten ze maachen. Et misst awer e Lien mam Spidol ginn, well soss d’Spideeler op eemol just nach déi Saache géife maachen, déi net lukrativ sinn an da wären d'Spideeler net méi finanzéierbar, sou d'Analys vum lénken Deputéierten.
D'Walvictoire vun den däitsche Lénken zu Berlin war och e Sujet. Et kéint ee vun den däitsche Lénke léieren. Dat géif Hoffnung maachen. Déi lénk Iddi fir zu Berlin grouss Immobiliekonzerner ze enteegnen, fënnt de Marc Baum net populistesch. Viru 5 Joer hat sech och an engem Volleksentscheed eng Majoritéit vu bal 60% fir eng "Vergesellschaftung" vun den Immobiliekonzerner ausgeschwat.
Nächste Mount, de 14. Oktober, gi fir déi Lénk zwee nei Deputéiert an der Chamber vereedegt. Ob d'Fro, ob dat Rotéieren a Plaz maache fir deen Nächste wierklech sënnvoll ass, sot de Marc Baum, et wär jo keng Iwwerraschung fir hie gewiescht an hien hätt sech drop agelooss. Ob een awer an Zukunft deen dote Rotatiounsprinzip bäibehält, wär Géigestand vun Diskussiounen, déi "ergebnisoffen" sinn.
Rendez-vous fir den Interview mam Invité vun der Redaktioun all Dag vu méindes bis freides um 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.
