"Am Ganzen hunn 1.208 Leit e Badge gebraucht, fir duerch d'Ausstellung ze goen. Dat ass eng imposant Zuel fir esou eng kuerz Period!" De Mann, vun deem dës Wierder stamen, dee muss et wëssen, well den Daniel Maurer ass ee vun de Käpp, déi hannert der Ausstellung "À la recherche de la vérité – Le journalisme et nous" stiechen.
Vu Mëtt September bis den 30. Oktober war déi kleng Expo aus der Schwäiz am Foyer vun der RTL City um Kierchbierg ze gesinn. Extra fir de Grand-Duché war d'Original-Ausstellung ëm e lëtzebuergesche Volet erweidert ginn: ëm Zuelen iwwer de Mediegebrauch hei am Land.
Am Zentrum vun der Expo stinn awer Froen, déi ëm Fakten a Fake News, ëm Desinformatioun a Recherche, ëm d'Aarbecht vu Journalisten a Journalistinnen an natierlech ëm d'Wourecht ginn. Provokant Spréch an en Escape Game an engem "News Room" inclus.
Déi héich Zuel vu Visiteure kënnt ënnert anerem duerch Schoulklassen zustanen: 59 hate sech der ugemellt, domat ware quasi sämtlech Slotte fir eng Visitt ausgebucht.
Ma fir jiddereen, deen d'Ausstellung nach hätt wëlle gesinn, gëtt et eng gutt Nouvelle: Et ass duerchaus méiglech, datt se nach emol op Lëtzebuerg kënnt. Detailer gëtt et zwar nach keng, well nach näischt fix ass, mee zwou Institutiounen hunn Interessi signaliséiert, d'Ausstellung nach eemol vun der Schwäiz op Lëtzebuerg kommen ze loossen. An och d'Nofro schéngt garantéiert...
D'Expo, déi bei RTL ze gesi war, gouf konzipéiert vun der Schwäizer Associatioun Journalistory.ch, d'Uni Lëtzebuerg huet se ëm e lëtzebuergesche Volet erweidert an op Lëtzebuerg bruecht huet se de Service des médias, de la connectivité et de la politique numérique (SMC) vum Staatsministère, dat am Partenariat mat der Schwäizer Ambassade zu Lëtzebuerg.
Nieft dem Vernissage mat villen Éieregäscht huet zum Kaderprogramm och eng Table ronde gehéiert, déi vum Jérôme Didelot vun RTL INFOS moderéiert gouf an un där véier Expertinnen, zwou aus der Schwäiz an zwou vu Lëtzebuerg, deelgeholl hunn. Se gouf op RTL Télé Lëtzebuerg gewisen, hei drënner an och op RTL PLAY kënnt Dir se nach eemol kucken.
Iwweregens: Iwwer nei Geforen an eiser digitaler Welt informéiert RTL och a senger Campagne Safety First - Secherheet am Internet. Vu Filterblosen iwwer Deepfakes an Desinformatioun bis hin zu Phishing a Cybergrooming kläre mir a kuerze Videoen op. RTL mécht déi Opklärungsaarbecht am Kontext vun EDMO, dem European Digital Media Observatory, an deem RTL Lëtzebuerg och vertrueden ass – an der belsch-lëtzebuergescher Branche BELUX.
Um Dag vun der Ouverture vun der Expo war de Sascha Helsper, Chef vum MediaCentre vun der Uni Lëtzebuerg, eisen Invité vun der Redaktioun. Am Interview huet hien och 3 Reegele virgestallt, fir besser mat Informatioun ëmzegoen. Hei fannt Dir seng dräi konkreet Rotschléi.
