An der RTL City hei um Kierchbierg geet vun en Dënschdeg un eng Expo fir de Grand Public a Schoulklassen op, wou et ëm Informatiounen, Journalismus a Medie geet. D'Ausstellung "À la recherche de la vérité: Le journalisme et nous" soll de Visiteuren hëllefen, sech méi bewosst mat Informatiounen an hire Quellen auserneenzesetzen, erkläert de Sascha Helsper, Chef vum MediaCentre vun der Uni Lëtzebuerg, dee mat doru geschafft huet. D'Zil ass net nëmmen ze weisen, wéi Journalismus funktionéiert, mee och d'Leit dozou ze bréngen, sech d'Fro ze stellen: "Wou kënnt eng Informatioun hier? A wéi kann ech bewäerten, ob se glafwierdeg ass?"
"Et ass jo hautdesdaags sou, dass mer Informatiounspluralismus a Mediepluralismus hunn, deen awer en extreem Bias huet an Richtung Social Media. Dat heescht, ech kréien jo nëmmen nach vun engem Algorithmus Saache geliwwert," erkläert den Expert fir Medien a Journalismus. Dofir soll ee sech froen, ob eng Informatioun och vun anere Quelle confirméiert gëtt a wien eventuell en Interessi dorun huet, datt dës Informatioun verbreet gëtt. Besonnesch wichteg ass dobäi d'Fro "Cui bono?", also wien huet eppes dovunner?
An der Medien-Pedagogik gëtt mat der sougenannter Inokulatiounstheorie geschafft, déi ursprénglech aus der Medezin kënnt. D'Iddi ass, Leit schonn am Viraus mat schwaachen oder vereinfachte Forme vun Desinformatioun ze konfrontéieren, fir datt si spéider besser erkennen, wa se mat Fake News oder Deep Fakes konfrontéiert ginn. Also carrement eng Zort Impfung géint Fake News, erkläert den Sascha Helsper. Allerdéngs besteet och e Risiko: Wien ze staark skeptesch gemaach gëtt, kéint um Enn guer keng Informatioun méi gleewen.
Mat Kënschtlecher Intelligenz gëtt et nach méi einfach, gefälschte Biller, Videoen an aner Inhalter ze produzéieren. Gläichzäiteg kënnen iwwer Social Media grouss Quantitéite vu manipuléierter Aktivitéit generéiert ginn, erkläert de Sascha Helsper. Rezent hätt hie mat op engem Projet geschafft, wou "Fake Activities" ënnersicht goufen, also wou een zum Beispill Likes a Kommentare kafe kann. Dobäi goufen an Europa ronn 1.700 Shops identifizéiert, iwwer déi een Likes a Kommentare ka kafen. "Dat heescht, ech hunn da 5.000 Likes, ech hu fir e Post 300 Commentairen a wat et méi natierlech ausgesäit, wat et méi deier gëtt."
D'ONG ResetTech hätt erausfonnt, dass fir déi rietspopulistesch AfD an Däitschland Posts aus Nigeria gemaach goufen. 1.200 Konte waren dorunner bedeelegt. Dovu waren 236 Kontoen an Nigeria. An déi waren dofir zoustänneg, dass 57 Prozent vun allen Posts, déi iwwert de Parteichef geschwat hunn, aus Nigeria koumen. De Fall weist, wéi einfach sech online e falscht Bild vu Popularitéit oder Ënnerstëtzung schafe léisst.
De Sascha Helsper ass och am Conseil vun EDMO. Dat ass den Europäeschen Observatoire fir Digital Medien. En europawäit Netzwierk, dat sech mat Desinformatiounen an och Fact-checking beschäftegt. Fir hien ass aktuell déi gréisste Gefor an de Soziale Medien ze gesinn. "Déi mussen och ënner déi selwecht Reegele falen, wéi zum Beispill Medienhaiser wéi RTL oder Wort oder Journal. [...] An dat geschitt de Moment net. An dat bréngt eis an d'Bredouille, well einfach d'Balance feelt."
An dësem Ëmfeld kritt de professionelle Journalismus eng nach méi wichteg Funktioun. Traditionell haten d'Medien ëmmer déi sougenannt "Gatekeeper-Roll", wou Informatioune iwwerpréift a Quellen evaluéiert goufen. Och sensibel Inhalter goufen net einfach onkontrolléiert publizéiert. Haut géing via d'Sozial Medie jiddereen alles posten ouni Konsequenzen. De Sascha Helsper gesäit doranner eng Erausfuerderung, well d'Kontrollmechanismen an d'Responsabilitéit net déi selwecht sinn. Gläichzäiteg betount hien, datt journalistesch Aarbecht Zäit brauch fir ze recherchéieren, Quellen ze bewäerten an Informatiounen an hire Kontext ze setzen.
Fir de Public huet de Sascha Helsper dräi konkret Rotschléi:
1. Wat mécht d'Informatioun mat mir?
Wann en Inhalt staark Emotiounen ausléist wéi Roserei oder Empörung, soll ee besonnesch virsiichteg sinn an net direkt reagéieren.
2. Kann ech der Quell vertrauen?
Et soll een iwwerpréiwen, wien eng Informatioun verbreet a sech froen, ob aner onofhängeg Quelle se kënne confirméieren.
3. A wéi engem Kontext steet d'Informatioun?
Eng Informatioun soll net isoléiert gekuckt ginn. Besonnesch bei politeschen Themen a Wale soll een op méiglech politesch oder wirtschaftlech Agendae oppassen.
Net alles gleewen, mee och net alles unzweiwelen, sou den Expert Sascha Helsper.
D'Ausstellung an der RTL City ass vum 21. September bis den 30. Oktober fir de Public op. D'Entrée ass gratis, mee eng Umeldung am Viraus ass néideg.
Rendez-vous fir den Interview mam Invité vun der Redaktioun all Dag vu méindes bis freides um 8 Auer op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op RTL Play ass d'Emissioun dono och am Replay ze fannen.
