Iwwer Facebook huet d’Gemeng Kielen e Méindeg de Moie matgedeelt, datt an der Nuecht op e Samschdeg Onbekannter hiert Onwiesen op der Spillplaz “Kielener Gare” gedriwwen hunn. Op Fotoen ass nieft der Signatur “Deep” och e Graffiti vun engem Hakekräiz a vu männleche Geschlechtsdeeler ze gesinn.
D’Gemeng wéilt juristesch Schrëtter aleeden a weist dorop hin, datt fir esou Doten eng Fräiheetsstrof tëscht aacht Deeg an engem Joer, wéi och eng Amende tëscht 251 a 5.000 Euro fälleg kéinte ginn.
Eventuell Zeie solle sech um Policebüro Capellen/Stengefort ënnert der Nummer (+352) 244 30 - 1000 mellen oder dem 113 uruffen. Infoen zu den Täter oder zum geneeën Zäitpunkt vun der Dot si wëllkomm.
