De Coronavirus ass definitiv zu Lëtzebuerg ukomm an d'Situatioun huet sech an de leschte 24 Stonnen drastesch geännert, dat soten de Premier Xavier Bettel an d'Gesondheetsministesch Paulette Lenert wéi se en Donneschdeg den Owend no engem weideren extraordinäre Regierungsrot wéinst der Longekrankheet virun d'Press getruede sinn. Deem zweete bannent 24 Stonnen.
Xavier Bettel: Déi Mesuren, déi mer haut decidéiert hunn, si vun enger Envergure, wéi se eenzegaarteg hei zu Lëtzebuerg sinn. An den nächsten Deeg a Woche ännert sech den Alldag an onsem Land a mir mussen eis upassen. Jidderee vun eis. Et geet elo drëms, d'Vitess mat där de Virus sech verbreet maximal ze drosselen. Et ass fundamental, dass mer alles maachen, fir nei Infektiounen esou wäit wéi et nëmme geet och ze evitéieren.“
