Mat bis zu 7.700 Leit e grousse Succès fir d'Organisateuren
Dëse Weekend war d'Garnisounsstad nees sou international wéi soss kaum am Joer: Vun iwwerall hier koume Leit, déi gären trëppelen, wanderen, marschéieren.
1968 gouf d’Marche de l’Armée eng éischte Kéier organiséiert. Bis 2015 war d’Lëtzebuerger Arméi fir dëst Evenement um Weekend no de Päischte responsabel. Zanter elo 10 Joer ass et eng Asbl, déi sech ëm d’Organisatioun këmmert. “Marche Internationale de Diekirch” heescht se dann dowéinst och elo. A mat 7.700 Leit hat d’Editioun vun dësem Joer och nees e grousse Succès, weess de Marc Streng, President vum Organisatiounscomité:
"Éischtens emol ass et eng wonnerschéi Géigend hei an Dikrech, bekannt wéi ech gesot hu, scho vun 1968 un. A mir hunn e Medailespigel, e Medailesystem. Mir gesinn haut, wie fir d'Éischt matgaangen ass, wann een haut sech umellt. Mir gesinn awer och, ob en 37 Mol hei war, 45 Mol hei war. An dat ass och eppes, wat ganz seelen op deene Marchen international dobaussen ass. An d'Leit sinn eebe stolz drop, dann ëmmer erëmzekommen, hir Medail ze weisen an och deenen aneren ze weisen, wéi oft datt se dann hei waren. Mir hunn 1.800 Lëtzebuerger, déi elo dëse Weekend hei participéieren a vill jonk Leit, vill Familljen, déi mat de Kanner ginn. Déi kënnen déi zwielef Kilometer goen, probéieren och heiansdo mol déi zwanzeg. An do hu mer en immensen Zouwuess, déi déi lescht Joren un der Jugend respektiv u jonke Familljen."
E ganze Weekend
Zwee Deeg laang koumen d'Frënn vum Trëppelen, Wanderen, Marschéieren an der Ieselsstad op hir Käschten, wann se dat da wollten. Bei der Marche Internationale de Diekirch konnte se aus dräi Parcourse wielen: 12 km, 20 km oder 40 km. Natierlech gi samschdes aner Weeër gaange wéi sonndes. A fir datt keen ze mann oder ze vill geet, sinn d'Weeër kloer markéiert: giel, rosa, blo. Sech verlafen war bal onméiglech a verluer goung een och net, well Dausende Leit waren op béiden Deeg op de Been – déi meescht am Ufank ganz zolidd, wann et aus Dikrech erausgoung, wann et dann am Nomëtteg nees eragoung, dann eng Grëtz méi wackeleg.
Esou war et net verwonnerlech, wann een um Weekend zu Dikrech eng sëllege Leit gesinn huet, déi schif gaange sinn.
Impressioune vum 1. Dag
Start war an Aler Seeërei
De Start war wéi alljoers an der Aler Seeërei, wou och zanter e Freideg dat neit Parkhaus nieft der Gare op war Moies war do ëmmer ganz vill Gebësels dran, wa jidderee sech säi Bändchen ofhuele wollt, fir datt ee sech dann och op de Kontrollpunkte konnt identifizéieren.
Dono goung et da lass, gemenkerhand direkt iwwer d'Sauer. Esou war et emol e Samschdeg. An datt vill Leit fréi u waren, hat wuel och mat der Meteo ze dinn: Et sollt uerg waarm ginn, also sech besser fréi op de Wee maachen, an am Nomëtteg sollt d'Wiederlag onstabil ginn, Wiedere waren net ausgeschloss. Et huet een et dann och heiansdo héieren dubberen, mee op d'mannst zu Dikrech si bis an de spéiden Nomëtteg era just ganz vereenzelt Drëpse gefall.
Impressioune vum 2. Dag
Eng 7.700 Umeldungen
Och wann een en cours de route ëmmer erëm Leit gesinn huet, déi eng Paus gebraucht, hir Blodere verpléischtert oder no hirem Krämpche kucke gelooss hunn, esou sinn déi allermeescht dono dach nees gutt an nach ëmmer gudder Déng zu Dikrech ukomm.
Dominéiert gëtt d'Bild vun Zaldoten, déi matmarschéinen. A se kommen nach laang net just aus den Nopeschlänner, och wann déi traditionell ganz staark vertruede sinn.
Fir d'Editioun 2025 gouf et eng 7.700 Umeldungen, 2.500 dovu vun Amerikaner an Amerikanerinnen.
Mee d'Bild vun der fréierer Marche de l'armée ass haut gutt gestéckelt. Et sinn och Tonnen Zivilisten derbäi, esouguer Poussettë gesäit een ënnerwee. An och eng Partie Muppen. Fir si sti virun eenzelen Haiser Bitercher mat Waasser dran ... och déi op véier Bee ginn duuschtereg.
Op anere Plaze wénken d'Kanner dem Cortège, dee laanschtzitt, oder se proposéiere Klengegkeeten, déi se verkafen – eppes ze drénken, Séisses, Saueres oder selwer gemaachten Hunneg.
Et sinn dës kleng Amenter, déi zu den Highlighte vun de Märsch gehéieren, natierlech nieft der herrlecher Landschaft, um Wupp vum Guttland, am Ufank vum Éislek, biergop, bierof, awer och ëmmer nees flaach laanscht d'Sauer oder d'Our.
