RTL - Startpräis bei 4,6 Milliounen Euro: Paräisser Villa vum Karl Lagerfeld gëtt e Méinde versteet

Eng Villa bei Paräis, déi der Moude-Ikon Karl Lagerfeld gehéiert huet, kënnt en Dënschdeg bei enger traditioneller "Käerze-Stee" ënnert den Hummer.

Eng Villa, déi dem legendäre Moude-Designer Karl Lagerfeld gehéiert huet, kënnt den 1. Juli vun 10 Auer un zu Louveciennes, westlech vu Paräis, bei enger rarer "Käerze-Stee" ënnert den Hummer. Bei dëser traditioneller Method kann esou laang gebuede ginn, bis zwou Käerzen ofgebrannt sinn, wat ongeféier 30 Sekonnen dauert.

De Startpräis fir d'Villa läit bei 4,6 Milliounen Euro.

De Lagerfeld huet d’Villa 2010 kaf a se als Plaz fir Kreativitéit a fir grouss Festivitéite genotzt. D’Proprietéit, déi zwee Hektar ëmfaasst, huet dräi Haiser, eng Schwämm, en Tennisterrain an eng grouss Parkanlag, déi Diskretioun soll garantéieren.

D’Haaptgebai kombinéiert klassesch Architektur mat engem zréckhalende Stil. Ze fannen ass ënnert anerem dem Lagerfeld säi Studio an eng kleng Replik vu sengem Kandheetszëmmer, inklusiv Tapéit mat Leoparde-Muster.

"Hien huet alles an dëst lescht Haus gestach, hie war ganz verléift dran an huet et als 'richteg Versioun' vu sech selwer bezeechent", sot seng Inspiratiounsquell (Muse) a Beroderin Amanda Harlech 2021. Et heescht, hien hätt nëmmen eng eenzeg Nuecht wierklech an der Villa geschlof, mee vill grouss Receptiounen, och eng fir d’Prinzessin Caroline vu Monaco, hei organiséiert.

D’Villa, déi ursprénglech dem Poet Leconte de Lisle an der Rothschild Famill am 19. Joerhonnert gehéiert huet, gouf extensiv renovéiert. Nom Lagerfeld sengem Doud 2019 stoung se eidel a gouf 2023 vun enger Immobiliëfirma opkaaft.

Dem Lagerfeld säi Paräisser Appartement gouf schonn am Mäerz 2024 versteet, dat fir 10 Milliounen Euro, also duebel sou vill, wéi u sech gefrot gouf.