D’Barbara Walters war déi éischt Fra, déi an den USA eng national Noriichtesendung am Owesprogramm presentéiert huet.
Si ass ausserdeem duerch eng Rei gréisser Interviewe bekannt ginn an huet nieft US-Presidenten och mat auslännesche Staatscheffen, wéi zum Beispill dem Fidel Castro, geschwat.
Nieft méi politeschen Themen huet si an hirer Karriär, déi iwwer fënnef Joerzéngte gelaf ass, och eng sëllege Promien interviewt.
Hire laangjäregen Employeur ABC huet an der Matdeelung zum Doud vun der Journalistin, déi ënner anerem 12 Emmyen gewonnen huet, keng Prezisiounen zu den Ëmstänn vun hirem Doud ginn.
